ރައީސް އިބްރާޙިމް މުހައްމަދު ސޯލިހުގެ ލީޑާޝިޕްގައި ރިޔާސީ އިންތިހާބު ފަސޭހައިން ކާމިޔާބު ކުރެވޭނެ ކަމަށް ރައީސް އޮފީހުގެ ޗީފް އޮފް ސްޓާފް އަދި އަދާލަތު ޕާޓީގެ ކުރީގެ ނައިބްރައީސް އަލީ ޒާހިރު (އަލިޕީ) ވިދާޅުވެއްޖެއެވެ.
އަލީ ޒާހިރު ކުރެއްވި ޓުވީޓެއްގައި ވިދާޅުވީ، ރައީސް ސޯލިހުގެ ލީޑާޝިޕްގައި އެމްޑީޕީ އިސްވެ އޮވެ، އަދާލަތު ޕާޓީ އާއި އެމްޑީއޭ ހިމެނޭ ކޯލިޝަން އެކުގައި މަސައްކަތް ކޮށްގެން 2023 ވަނަ އަހަރުގެ ރިޔާސީ އިންތިހާބު ފަސޭހައިން ކާމިޔާބު ކުރެވޭނެ ކަމަށެވެ.
އަލީ ޒާހިރު މިހެން ވިދާޅުވެފައި މިވަނީ ޖޭޕީއިން އިސްވެ އޮވެ، ކޯލިޝަނެއް ހަދައިގެން ރިޔާސީ އިންތިހާބުގައި ވާދަކުރަން ނިންމާފައިވާ ދަނޑިވަޅެއްގައެވެ.
ކުރިޔަށް އޮތް ރިޔާސީ އިންތިހާބުގައި އެމްޑީއޭގެ އިތުރުން އަދާލަތުން އެމްޑީޕީއާއެކު ކޯލިޝަން ހަދަން ނިންމާފައިވާއިރު، ޖޭޕީން ނިންމީ ވަކިން ވާދަކުރަންށެވެ. އަދި އެމްއާރްއެމްއަކުން ވަކި ގޮތެއް ނުނިންމައެވެ.
