ހއ.ދިއްދޫ މަގުތައް ހެދުމުގެ އަމަލީ މަސައްކަތް ފަށައިފިއެވެ.
ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ) އިން ބުނީ، ދިއްދޫ މަގު ހެދުމުގެ މަސައްކަތް މިހާރު ވަނީ ފެށިފައި ކަމަށާއި، އެ މަސައްކަތުގެ ދަށުން މިހާރު ކުރިޔަށް ދަނީ އެ ރަށު ޣާޒީމަގުގައި ކޭބަލް ޖަންކްޝަން އެޅުމާއި ހޮޅި ވަޅުލުމުގެ މަސައްކަތް ކަމަށެވެ.
ދިއްދޫ މަގު ހެދުމަށް އާރްޑީސީއާ މި އަހަރުގެ މެއި މަހުގެ ތެރޭގައި ހަވާލުކުރިއިރު، މަޝްރޫއުގެ އަގަކީ 108.5 މިލިއަން ރުފިޔާ އެވެ.
މި މަޝްރޫގެ ދަށުން 5.4 ކިލޯމީޓަރުގެ މަގުގައި ތާރު އެޅުމާއި، ފެން ހިންދާ ނިޒާމް ގާއިމު ކުރުމުގެ އިތުރުން މަގު ބައްތި ހަރުކުރުން ހިމެނެއެވެ.
