މި ސަރުކާރުން ތަރައްގީ ކުރަމުން އަންނަ ފްލެޓްތަކަށް ދައުރު ނިމުމުގެ ކުރިން ވަދެވޭނެ ކަމަށް ރައީސް އިބްރާހިމް މުހައްމަދު ސޯލިހު ވިދާޅުވެއްޖެއެވެ.
ނޫސްވެރިންނާ ބައްދަލު ކުރައްވައި ރައީސް ސޯލިހު ވިދާޅުވީ، ސަރުކާރުން އިއުލާން ކޮށްފައިވާ ބޯހިޔާވަހިކަމުގެ މަޝްރޫއުތަކަށް ކުރިމަތިލީ މީހުންގެ ފޯމްތައް އިވެލުއޭޓްކުރެއްވުމުގެ މަސައްކަތް ޖޫންމަހު ނިންމަލެވޭނެ ކަމަށާއި، އަދި ދައުރު ނިމުގެ ކުރިން ފްލެޓްތަކަށް ވަދެވޭނެ ކަމަށެވެ.
މި އަހަރުގެ ރިޔާސީ ބަޔާނުގައި ވިދާޅުވި ފަދައިން ބޯހިޔާވަހިކަމުގެ މަޝްރޫޢުތަކުގެ ތެރެއިން ފްލެޓާއި ގޯތިލިބޭ މީހުން ކުރިއަށް އޮތް ޖޫން މަހުގެ ތެރޭގައި ސަރުކާރުން ޢިއުލާން ކުރާނެ ކަމަށާއި، ބޯހިޔާވަހިކަމަށް ޝަރުތުހަމަވާ މީހުންނާއި ނުވާ މީހުން ދެނެގަތުމުގެ ބޮޑު ބައެއް ނިމިފައިވާ ކަމަށްވެސް ރައީސް ސޯލިހު ވަނީ ވިދާޅުވެފައެވެ.
މީގެއިތުރުން ނޫސްވެރިންގެ ބައްދަލުވުމުގައި އިކޮނޮމިކް މިނިސްޓަރ ފައްޔާޒް އިސްމާއިލް ވިދާޅުވީ، ވީ އޯގަސްޓްމަހާ ހިސާބަށްދާއިރު ބައެއް ޓަވަރުތަކުގެ ސްޓްރަކްޗަރގެ މަސައްކަތް އެއްކޮށް ނިމޭނެ ކަމަށެވެ. އަދި އަދި އެހާހިސާބަށް 8 ޓަވަރަކަށް މީހުންނަށް ވަދެވެވޭވަރު ވާނެ ކަމަށްވެސް މިނިސްޓަރ ވަނީ ވިދާޅުވެފައެވެ.
