ހުޅުމާލޭ ދެވަނަ ފޭސްގައި ތަރައްގީކޮށްފައިވާ ހިޔާ ފްލެޓްގެ ޓަވަރެއްގައި ދެ އެޕާޓްމަންޓް އެއްކޮށްލި މައްސަލައިގައި އެތަން އަލުން ހުރި ގޮތަށް ބަދަލުކުރުމަށް އިތުރު ހަތް ދުވަސް ދީފިއެވެ.
އާބަންކޯއިން ބުނީ، އަލުން ބައިކޮށް މެދު ފާރު ރާނައި ކުރީ ހުރިގޮތަށް ބަދަލުކުރަން ދީފައިވާ މުއްދަތު އިތުރު ކުރުމަށް އެތަނުގެ ވެރިން ހުށަހަޅާފައިވާތީ، ހުށަހެޅުމުގައި ހުރި ސަބަބުތަކަށް ރިޔާއަތްކޮށް އިތުރު ހަތް ދުވަސް ދިނުމަށް ނިންމާފައިވާ ކަމަށެވެ.
ހިޔާގެ ދެ ފްލެޓް އެއްކޮށްލި މައްސަލައިގައި އާބަންކޯއިން ވަނީ ދެ ފްލެޓްގެ ވެރިން ދެ ލައްކަ ރުފިޔާއިން ޖޫރިމަނާކޮށް، ޔުނިޓްތައް ހަވާލުކުރިއިރު ހުރި ގޮތަށް ބަދަލުކުރަން އަންގައި، އެގޮތަށް އެކަން ކޮށްފައި ނުވާތީ އެގްރީމަންޓްވެސް ބާތިލްކުރަން ނިންމާފައެވެ.
