ރައްޔިތުންގެ މަޖިލީހުގެ ނައިބްރައީސް އީވާ އަބްދުﷲ ގެ އިތުބާރު ނެތްކަމުގެ މައްސަލައިގެ ނޯޓިސް ހަމަވުމުން، އެ މައްސަލަ ނުނިންމައި މަޖިލިސް ކުރިޔަށް ނުގެންދެވޭނެ ކަމަށް އެމްޑީޕީގެ ޕީޖީ ގްރޫޕްގެ ލީޑަރ ހިތަދޫ އުތުރު ދާއިރާގެ މެމްބަރު މުހައްމަދު އަސްލަމް ވިދާޅުވެއްޖެއެވެ.
އެމްޑީޕީ ޕީޖީ ގްރޫޕުން ބޭއްވި ނޫސްވެރިންގެ ބައްދަލުވުމުގައި އަސްލަމް ވިދާޅުވީ، މަޖިލީހުގެ ނައިބްރައީސްގެ އިތުބާރު ނެތްކަމުގެ މައްސަލައިގައި ފޮނުވި ނޯޓިސް އަންނަ ހޯމަ ދުވަހު ހަމަވާނެ ކަމަށާއި، ނޯޓިސް ހަމަވެފައި ވަނިކޮށް އެހެން ކަމެއް ކުރިއަށް ގެންދަން މަޖިލީހުގެ ގަވައިދު ތަންނުދޭ ކަމަށެވެ.
މީގެއިތުރުން އަސްލަމް ވިދާޅުވީ، ބައެއް ބޭފުޅުން އެކި ގޮތްގޮތަށް ގާނޫނު މާނާ ކުރައްވަމުންދާ ކަމަށާއި، އެދުމަކީ އެންމެންވެސް ގާނޫނަށް އަނބުރާ ރުޖޫއަވުން ކަމަށެވެ، އަދި ސިޔާސީ ބޭނުމަށް ގާނޫނު އެކި ގޮތްގޮތަށް މާނަ ނުކުރެއްވުމަށްވެސް އަސްލަމް ވަނީ އެދިވަޑައިގެންފައެވެ.
