ޕީޕީއެމް/ޕީއެންސީއިން ކުރިއަށް އޮތް ރިޔާސީ އިންތިހާބުގެ އަމަލީ މަސައްކަތް ފެށީ މިދިޔަ ހޯމަ ދުވަހުއެވެ. އެއީ، ހިޔާނާތުގެ ކުށް ސާބިތުވެ ޖަލު ހުކުމެއް ތަންފީޒު ކުރައްވަމުން ގެންދަވާ އެ ޕާޓީގެ ރިޔާސީ ކެނޑިޑޭޓް ރަަައީސް އަބްދުﷲ ޔާމީން އަބްދުލްގައްޔޫމްއަށް ކެމްޕޭން ކޮށްދިނުން ނަމުގައި މާލޭގައި ދޮރުން ދޮރަށް ހިނގުމުގެ ހަރަކާތަކުންނެވެ. ރާއްޖޭގައި އޮތް އެންމެ ބޮޑު އިދިކޮޅު ޕާޓީއަށްވެ ރިޔާސީ އިންތިހާބަށް ޕީޕީއެމް/ޕީއެންސީގެ ކެމްޕޭން ބަރަވެލި ސްޕީޑުގައި ފެންނަނީ އެންމެ ސަބަބަކާހުރެއެވެ. ޕާޓީގެ ޓިކެޓު ދޫކޮށްލެއްވުމަށް ރައީސް ޔާމީން ދެކޮޅު ހައްދަވާތީއެވެ.
ރައީސް ޔާމީނަށް ކުރިއަށް އޮތް ރިޔާސީ އިންތިހާބުގައި ކުރިމަތި ނުލެވޭނޭކަން ޕާޓީގެ އިސް ސަފުގައި ތިބި އެންމެނަށްވެސް ވަރަށް ސާފެވެ. އެމަނިކުފާނުގެ އިސްތިއުނާފު މައްސަލަ ހިނގާލެއް ލަސްކަމުންނާއި، އިތުރު ދައުވާތައްވެސް ހިނގަމުންދާތީ، އިންތިހާބުގެ ކުރިން އެމަނިކުފާނު މިނިވަންވާނޭކަމަކަށް އެ ބޭފުޅުންވެސް ގަބޫލެއް ނުކުރައްވައެވެ. ނަމަވެސް، ޕީޕީއެމް/ޕީއެންސީ ހިންގުމާއި ހަވާލުވެވަޑައިގެން ހުންނެވީ ރައީސް ޔާމީނަށް ތާއީދުކުރާ ބޭފުޅަކަށްވެފައި، ޕާޓީ ތެރޭގައި އަދިވެސް އޮތީ އެމަނިކުފާނުގެ ބާރުކަމުން، އެކަމާއި އެއްޗެއް ނުބުނެ މަޑުން އެންމެން ތިބީއެވެ. ކެމްޕޭން ކުރުމަށްވެސް މާ މަސައްކަތެއް ނުކޮށެވެ.
އެހެންނަމަވެސް، ރިޔާސީ އިންތިހާބަށް ކުރިމަތިލުމުގެ ވަގުތު ކުޑަތަންވެ، އިންތިހާބަށް ދެ މަހަށް ކައިރިވެފައިވާއިރު، ރައީސް ޔާމީން ނޫން ގޮތަކާއި މެދު ވިސްނަން އެ ބޭފުޅުންނަށްވެސް މަޖުބޫރެވެ. އެ ސައްލާތަށް އިސް ސަފުގައި ވަކި ވަކި ގްރޫޕް ހަދައިގެން ކުރިއަށް ގެންދާތާ ދުވަސްތަކެއްވެސް ވެއްޖެއެވެ. ފެންނަފެނުމަށް، މާލޭގެ ދޮރުންދޮރަށް ކެމްޕޭން ފެށުމަކީ އޭގެތެރެއިން ކާމިޔާބުވި ކޮން ގްރޫޕެއްކަން ސާފުވާ ހެއްކެކެވެ.
ޕީޕީއެމް/ޕީއެންސީ އިސް ސަފުގައި ތިއްބެވި ބޭފުޅުންގެ ތެރެއިން ރިޔާސީ ހުވަފެންދެކޭ ގިނަ ބޭފުޅުން އެބަތިއްބެވެ. ކުރީގެ އިކޮނޮމިކް މިނިސްޓަރު، އަދި މާވަށު ދާއިރާގެ މަޖިލިސް މެންބަރު މުހައްމަދު ސައީދާއި، ކުރީގެ ނައިބު ރައީސް ޖަމީލްއާއި، ކުރީގެ ރައީސް ޑރ.ވަހީދާއި، ރައީސް ޔާމީންގެ ކުރީގެ ރަނިންގ މޭޓް ޑރ. ޝަހީމްއަކީ އޭގެތެރެއިން ބައެއް ނަންނަމެވެ. އެކަމަކު، އެންމެ ފާހަގަ ކޮށްލެވޭ ނަމަކީ ކުރީގެ ހައުސިންގ މިނިސްޓަރ، އަދި މިހާރު މާލެ ސިޓީ މޭޔަރު ޑރ.މުއިއްޒުއެވެ.
މޭލޭގެ ދޮރުންދޮރަށް ކެމްޕޭން ފެށުމަށް ބޭއްވި ޖަލްސާއަށް ކުރިން ބުނެވުނު ބައެއް ބޭފުޅުން ވަޑައިނުގެންނެވީވެސް އެހެންވެ ކަމަށް ގަބޫލުކުރެވެއެވެ. ޕާޓީގެ ތެރެއިން ރިޔާސީ ޓިކެޓު ކަށަވަރު ނުވާނޭކަން ޔަގީންވުމާއެކު، އެކަމާއި ހިތްހަމަނުޖެހުނީއެވެ. އެހެނަސް، އެ ކެމްޕޭނުގައި އިސް ސަފުގައި އެތަނުން އެއް ބޭފުޅަކު ވަރަށް ހަރަކާތްތެރިއެވެ. ރިޔާސީ ޓިކެޓު ރޭހުގައި ކުރީގައި އުޅުއްވާ ޑރ. މުއިއްޒުއެވެ.
ޑރ.މުއިއްޒު ރޭހުގެ ކުރިއަށް ޖެހިލީ މާލޭ ސިޓީ މޭޔަރުކަން ލިބުނު ހިސާބުންނެވެ. އެ ޕާޓީ ސެނެޓުގެ ގިނަ ބޭފުޅުންނާއި، ނަން ހިނގާ އެކްޓިވިސްޓުންނާއި، އަދިވެސް ގްރާސްރޫޓުގެ ގިނަ ބަޔަކަށް އެކި ނަންނަމުގައި ސިޓީ ކައުންސިލުން ވަޒީފާތައް ހަމަޖައްސައިދީގެންނެވެ. ކައިރީގައި ގެންގުޅުއްވާ ކައުންސިލް މެންބަރުންވެސް އެކި ގޮތްތޮތަށް ރުއްސައިގެންނެވެ. ޕާޓީގެ އެތެރޭގެ ކޮންޓްރޯލް މަޑުމަޑުން ނަންގަވަމުން ދިޔައީ، އެ ފުރުސަތު އެންމެ ބޮޑަށް ފަހިވެފައިއޮތީވެސް މުއިއްޒުއަށް ކަމަށްވާތީއެވެ. އެކަމުގެ ބޭނުން ހިފަން ވަރަށް ރަނގަޅަށްވެސް ދަނެގެންނެވެ.
ކަންކަން މިހެން ހުރުމާއެކުވެސް، މުއިއްޒުއަށް ޕާޓީގެ ކޮންޓްރޯލް މުޅިން ލިބިފައިވާކަމަށް ގަބޫލުކުރަން ދައްޗެވެ. ރައީސް ޔާމީނާއި ދެކޮޅަށް ސީދާ ތެދުވާން ބޭނުންނުވަނީވެސް އެހެންވެއެވެ. މިވަގުތަށް ޖެހެނީ ކެތްތެރިކަން އިސްކުރާށެވެ. އިންތިހާބަށް ރައީސް ޔާމީން ކުރިމަތިނުލެވޭނޭކަން ޔަގީންވެ އެމަނިކުފާނު އަމިއްލައަށް ޓިކެޓު ދޫކުރައްވަންދެން މަޑުކުރާށެވެ.
އެހެނަސް، އިންތިހާބަށް ކެމްޕޭން މިހާރު ފަށަންވެއްޖެކަން މުއިއްޒުގެ ޓީމަށް އެނގެއެވެ. ހޯމަ ދިވަހު އެ ޓީމުން އެ ފެށީ އެ މަސައްކަތެވެ. ކެމްޕޭން މެނޭޖަރު ކެޕްޓަން އަމީން ޖެހިގެން އެންމެ އަރިހުގައި ހުންނަވަނީ މުއިއްޒުއެވެ. ފެއްޓެވީ މާލެއަށެވެ. ބޭނުމަކީ، މޭޔަރު ކަމުގެ ހައިސިއްޔަތު ބޭނުންކޮށް، ދޮރުންދޮރަށް ހިނގަން ފެށުމެވެ. އެމަނިކުފާނުގެ މޫނު ގިނަ މީހުންނަށް ފެންނާނޭ ގޮތް ހަދަންށެވެ. އެއީ ޕީޕީއެމްއާ ދުރު ކެނޑިޑޭޓެއް ނޫންކަމާއި، ރައީސް ޔާމީން ނެތް ހާލަތުގައިވެސް އެންމެ އައުލާކަންބޮޑީ މުއިއްޒުކަމަށް ދެއްކުމަށެވެ.
