ހއ.އިހަވަންދޫ ބިން ހިއްކުމުގެ މަޝްރޫއު އެމްޓީސީސީން ފަށައިފިއެވެ.
އެމްޓީސީސީން ބުނީ، އިހވަނަްދޫ ބިން ހިއްކުމަށް ގެނެސްފައި ވަނީ ދުވާލަކު ހެކްޓަރެއް ހިއްކުމުގެ ގާބިލްކަން ލިބިފައިވާ ޑްރެޖަރެއް ކަމަށްވާއިރު، އެ ޑްރެޖަރު ބޭނުންކޮށްގެން ބިން ހިއްކުމުގެ މަސައްކަތް މިއަދު ވަނީ ފަށާފައި ކަމަށެވެ. އަދި އިހަވަންދޫގެ ބިން ހިއްކުމުގެ މަސައްކަތް 8 ދުވަސް ތެރޭގައި ނިންމާލެވޭނެ ކަމަށްވެސް އެ ކުންފުނިން ބުނެއެވެ.
މި މަޝްރޫއުގެ ދަށުން 25 ހެކްޓަރުގެ ބިން ހިއްކަން ހަމަޖެހިފައިވާއިރު، ބިން ހިއްކުމަށްފަހު ހިއްކާ ސަރަޙައްދުގެ ޙިމާޔަތްކުރުމަށް 850 މީޓަރުގެ ބޮޑު ހިލައިގެ ތޮށިލުމުގެ މަސައްކަތް ފެށުމަށް ވަނީ ހަމަޖެހިފައެވެ.
މި މަޝްރޫއަށް 116.94 މިލިއަން ރުފިޔާ ހަރަދުވާނެ ކަމަށް އެމްޓީސީސީން ބުނެއެވެ.
