ކުރިއަށް އޮތް ރިޔާސީ އިންތިހާބު ކާމިޔާބު ކުރެވިއްޖެނަމަ، މ.މުލަކަށް ގިނަ ކަންތައްތަކެއް ކޮށްދެއްވަން ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު މިރޭ ވައުދުވެވަޑައިގެންފިއެވެ.
ރިޔާސީ އިންތިހާބަށް ކެމްޕޭން ކުރުމުގެ ގޮތުން މ. އަތޮޅަށް ކުރައްވަމުން ގެންދަވާ ދަތުރުފުޅުގެ ތެރެއިން މިއަދު ރައީސް ވަނީ އެ އަތޮޅު ނާލާފުށި، ކޮޅުފުށި، މުލި އަދި މުލަކަށް ވަޑައިގެންފައެވެ. އެގޮތުން، މުލަކަށް ވަޑައިގެން ރައީސް ވަނީ މި ދައުރުގައި މުލަކަށް ކޮށްދެވުނު ކަންތައްތަކާއި، އަންނަ ދައުރުގައި ކޮށްދިނުމަށް ހަމަޖެހިފައިވާ ގިނަ ކަންތައްތަކެއްވެސް ހިއްސާކުރައްވާފައެވެ.
އެގޮތުން، ރައީސް ވިދާޅުވީ މުލަކަށް ވީ ވައުދުތަކުގެ ތެރެއިން ގިނަ ވައުދުތައް މިހާރު ނިމެމުން އަންނަ ކަމަށެވެ. އެމަނިކުފާނު އެދޭ ބާރު މިނުގައި ބައެއް މަޝްރޫއުތައް ނުހިނގާކަމަށާއި، އެހެން ހުރި މަޝްރޫއުތައް ފާހަގަކޮށް ހަލުވިކުރުމަށް ފިޔަވަޅުތައް އަޅަމުން އަންނަ ކަމަށްވެސް ރައީސް ވިދާޅުވިއެވެ. ރައީސް ވަނީ މުލަކު މަގު ހެދުމާއި ބަނދަރު ބޮޑު ކުރުމުގެ މަޝްރޫއު ލަސްކަން ފާހަގަކުރައްވާފައެވެ.
އެހެންނަމަވެސް، މަގު ހެދުމުގެ މަޝްރޫއުވެސް ކުރިއަށް މިހާރު ދާއިރު، ރައީސް ވިދާޅުވީ އަމާޒަކީ އެ މަޝްރޫއު ފުޅާކޮށް މުލަކުގެ ހުރިހާ މަގެއް މަޝްރޫއުގެ ތެރެއަށްލުން ކަމަށެވެ. އަދި، ބަނދަރުގެ މަސައްކަތްވެސް މިހާރު ނިމެމުން އަންނަ ކަމަށާއި، އެއާއެކު އެ ރަށުގެ މަސްވެރިންނަށް ގިނަ ލުއިފަސޭހަތަކެއް ލިބިގެންދާނެ ކަމަށެވެ.
އެގޮތުން، އެ ރަށުގައި މިފްކޯގެ މަސް ކަލެކްޓިންގ ސެންޓަރެއް ގާއިމްކުރުމުގެ ވިސްނުން ގެންގުޅުއްވާކަން ރައީސް ވަނީ މިރޭ ހިއްސާކުރައްވާފައެވެ. ބަނދަރުގެ މަސައްކަތް ނިމޭއިރު، ފްރީޒިންގ ކެޕޭސިޓީއާއި ކޯލްޑް ސްޓޯރޭޖްވެސް ގާއިމް ކުރުމަށް ސަރުކާރުން ނިންމައި މިހާރު ވަނީ ޓެންޑަރ އަށް ހުޅުވާލާފައެވެ. ރައީސް ވިދާޅުވީ އެ މަސައްކަތް ނިމެންދެން، މަސް ގަނެވޭނެ ކަލެކްޓިންގ ވެސަލްއެއް އެ ސަރަހައްދުގައި ބާއްވާނެ ކަމަށެވެ. އެކަން ކުރުމަށް ހަމަޖެހިފައިވަނީ، މިފްކޯއަށް އަލަށް ގެނައުމަށް ހަމަޖެހިފައިވާ ތިން ބޯޓުން އެއް ބޯޓު އެ ސަރަހައްދަށް ހާއްސަކޮށްގެންނެވެ.
މީގެއިތުުރުންވެސް، މުލަކު ރައްޔިތުންނަށް އޭޓީއެމްގެ ހިދުމަތް އިންތިހާއަށް ބޭނުންވާކަން ފާހަގަކުރެވި، އެންމެ އަވަހަށް އޭޓީއެމް ބަހައްޓާ ރަށްރަށުގެ ލިސްޓަށް މުލަކު އިތުރުކުރެވިފައިވާކަންވެސް ރައީސް އިއުލާންކުރެއްވިއެވެ. އެއާއެކު، މި އަހަރުގެ ތެރޭގައި މުލަކުގައި އޭޓީއެމްއެއް ބެހެއްޓޭނެއެވެ. މުލަކަކީ ބޯހިޔާވަހިކަމުގެ ދަތިކަންވެސް ކުރިމަތިވެފައިވާ ރަށެކެވެ. އެކަމަށްވެސް އަންނަ ދައުރުގައި ހައްލެއް ހޯދައިދެއްވާނެ ކަމަށް ރައީސް ވަނީ މިރޭ ވިދާޅުވެފައެވެ.
