އަންނަ ދައުރުގައި ނ. މަގޫދޫ ކައިިރން ޕިކްނިކް ދާނެ ރަށެއް ހަމަޖައްސައި، އެ ރަށު ހެލްތު ސެންޓަރު އެކްސްޓެންޝަން ބިލްޑިންގ އަކާއި ލެބޯޓަރީއެއް އަޅައި، ސްކޫލަށް މަލްޓިޕާޕަސް ހޯލެއް އަޅައިދޭނެކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ޞޯލިހު ވައުދުވެވަޑައިގެންފިއެވެ.
ރައީސް މިގޮތަށް ވައުދުވެވަޑައިގެންނެވީ ރިޔާސީ އިންތިހާބަށް ކެމްޕޭން ކުރުމުގެ ގޮތުން ނ. އަތޮޅަށް ކުރައްވަމުން ގެންދަވާ ދަތުރުގެ ތެރެއިން އެ އަތޮޅު މަގޫދޫއަށް ވަޑައިގެން މިއަދު ބޭއްވި ޖަލްސާގައި ވާހަކަފުޅުދައްކަވަމުންނެވެ. އެގޮތުން، އެ ޖަލްސާގައި ރައީސް ވިދާޅުވީ، މަގޫދޫއަކީ އަޅާނުލައި ދޫކޮށްފައި އޮތް ރަށްތަކުގެ ތެރެއިން ރަށެއް ކަމަށެވެ. މަގޫދޫގެ އާބާދީއަކީ ގާތްގަޑަކަށް 300 އެއްހާ މީހުންނެވެ. ރައީސް ވިދާޅުވީ، ސިޔާސީ ބޭނުމެއް ނެތި ކުރީގެ ސަރުކާރުތަކުން ކަންކަން ނުކުރުމުގެ ނަތީޖާއަކީ، ހުރިހާ ކަމެއްވެސް ކުރަނީ ހަމައެކަނި ބޮޑެތި އާބާދީތަކަށް ކަމަށެވެ. އެހެން ސަރުކާރުތަކާއި ހިލާފަށް މި ސަރުކާރުގެ އަމާޒަކީ ހުރިހާ ރަށަކަށްވެސް އަސާސީ ހިދުމަތް ފޯރުކޮށްދިނުމެވެ.
ކުޑަމިނުން މަގޫދޫގައި ސަރުކާރުން އެޅި މިސްކިތެއްވެސް ނެތްކަން ފާހަގަކުރައްވަމުން ރައީސް ވިދާޅުވީ، 2018 ވަނަ އަހަރު ކެމްޕޭނަށް ވަޑައިގަތުމުންވެސް އެ ރަށު ރައްޔިތުން އެދުނީ ސަރުކާރުން މިސްކިތެއް އަޅައިދިނުމަށް ކަމަށެވެ. ކޮވިޑުގެ ދަތި އުނދަގުލާއެކުވެސް އެކަން ކޮށް ނިންމާފައިވާއިރު، މިހާރު ކުރިއަށް ދަނީ ބަނދަރު ބޮޑު ކުރުމުގެ މަސައްކަތެވެ. ކަރަންޓުގެ ހިދުމަތްވެސް ރަނގަޅުކޮށް، އައު އިންޖީނުގެއެއް މަގޫދޫގައި އަޅާފައިވާއިރު، ފެނާއި ނަރުދަމާގެ ނިޒާމުވެސް އެ ރަށުގައި ދަނީ ނިމެމުންނެވެ.
އަންނަ ދައުރުގައި މަގޫދޫއަށް ކޮށްދިނުމަށް ހަމަޖެހިފައިވާ ކަންކަމަށް އަލިއަޅުއްވާލައްވަމުން ރައީސް ވިދާޅުވީ، ރައްޔިތުންގެ އެންމެ ބޮޑު އެދުމަކީ އަމިއްލަ ގެވަޅުގައި ގެ އެޅޭނެ ގޮތެއް ހޯދުމަށްކަމަށެވެ. ސަރުކާރުން އަންނަ ދައުރުގައި ހުޅުވާ ހައުސިންގ ފަންޑުން އެ ރަށަށްވެސް ފައިދާވާނެކަން ރައީސް ފާހަގަކުރެއްވިއެވެ. މީގެއިތުރުން، ސްކޫލުގެ ފެންވަރު ރަނގަޅު ކުރުމުގެ ގޮތުން މަލްޓިޕާޕަސް ހޯލެއް އެޅުމަށް ވަނީ ހަމަޖެހިފައެވެ. މަގޫދޫގެ ހެލްތު ސެންޓަރު އެކްސްޓެންޝަން ބިލްޑިންގ އެއްވެސް އަޅައި، ލެބޯޓަރީގެ ހިދުމަތް ލިބޭނެ ގޮތްވެސް ހަމަޖައްސައިދެއްވާނެ ކަމަށް ރައީސް ވަނީ ވައުދުވެވަޑައިގެންފައެވެ.
މިއަދުގެ ޖަލްސާގައި ރައީސް ޞޯލިހު ވިދާޅުވީ، އަސާސީ ހިދުމަތްތައް ނިންމަމުން ގެންދަނީ އިގްތިސާދު ކުރިއަރާނެ ގޮތް ވިސްނައިގެން ކަމަށެވެ. މަގޫދޫއަކީ ރީތި ބޮޑު ރަށެއް ކަމަށާއި އެ ރަށުގައި ރަށު ފަތުރުވެރިކަންވެސް ކުރިއެރުވޭނެ ކަމަށެވެ. މަގޫދޫ ކައިރީގައި އެއާޕޯޓެއްވެސް އެބައޮތް ކަމަށާއި، ޕިކްނިކް ދާނެ ރަށެއްވެސް އަންނަ ދައުރުގައި ހަމަޖައްސައިދެއްވާނެ ކަމަށެވެ.
މަގޫދޫގެ ރައްޔިތުންގެ ކިބައިން ރައީސް އެދިވަޑައިގެންނެވީ، އަންނަމުންދާ ތަރައްގީއާއެކު ކުރިއަށް ދިޔުމަށެވެ. އެހެން ޕާޓީތަކުން ކުދި ރަށްތަކަށް އަޅާނުލާނެ ކަމަށާއި، އެކަން ކުރަމުންދަނީ މި ސަރުކާރުން ކަމަށެވެ.
