އަންނަ ދައުރުގައި ނ. ހޮޅުދޫގައި ރޯހައުސް ނުވަތަ ފްލެޓާއި، ސްޕޯޓްސް ކޮމްޕްލެކްސްއަކާއި އައު މިސްކިތެއްގެ އިތުރުން، ރަށު އިހްތިސާސް ތެރޭ ހޮޅުމީދޫ ހިމަނައި އެ ރަށް ތަރައްގީކުރާނަން އަޅައިދޭނެކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ޞޯލިހު ވައުދުވެވަޑައިގެންފިއެވެ.
ރައީސް މިގޮތަށް ވައުދުވެވަޑައިގެންނެވީ ރިޔާސީ އިންތިހާބަށް ކެމްޕޭން ކުރުމުގެ ގޮތުން ނ. އަތޮޅަށް ކުރައްވަމުން ގެންދަވާ ދަތުރުގެ ތެރެއިން އެ އަތޮޅު ހޮޅުދޫއަށް ވަޑައިގެން މިއަދު ބޭއްވި ޖަލްސާގައި ވާހަކަފުޅުދައްކަވަމުންނެވެ. އެގޮތުން، އެ ޖަލްސާގައި ރައީސް ވިދާޅުވީ، ހޮޅުދޫއަކީ ތައުލީމީ ދާއިރާގައި މަޝްހޫރު ރަށެއް ކަމަށެވެ. އެ ރަށު މޭނާ ސްކޫލަކީ 75 އަހަރުވީ ސްކޫލެކެވެ. އެ ސްކޫލަކީ އުތުރާއި މާލޭގެ ގިނަ ދަރިވަރުންތަކެއްވެސް ތައުލީމު ހާސިލްކޮށްފައިވާ ސްކޫލެކެވެ. ރައީސް ވިދާޅުވީ، ތައުލީމީ ދާއިރާގެ ކުރިއެރުވުމަށް މި ސަރުކާރުން ކުރެވުނު ކަންތައްތަކަކީ ކުރެވުނު އެންމެ މުހިންމު މަސައްކަތް ކަމަށެވެ.
18،000 ދަރިވަރުން ހިލޭ ޑިގްރީގައި ކިޔަވަމުންދާއިރު، 7،000 ދަރިވަރުން ވަނީ ކިޔަވާ ނިމިފައެވެ. އަންނަ ދައުރުގައިވެސް ތައުލީމީ ދާއިރާއަށް މުހިންމު ބަދަލުތަކެއް ގެންނަވާނެ ކަމަށާއި، ހުރިހާ ސްކޫލެއް އެއް ދަންފަޅިއަށް ބަދަލުކޮށް، ޓިއުޝަނަށް ބަރޯސާވުން ހުއްޓުވުމުގެ ގޮތުން ހާއްސަ ޕްރޮގްރާމްތަކެއް ހިންގަވާނެ ކަމަށެވެ.
މި ޖަލްސާގައި ރައީސް ވަނީ ހޮޅުދޫއަށް މި ދައުރުގައި ކުރެވުނު ބައެއް ކަންތައްތަކަށްވެސް އަލިއަޅުއްވާލައްވާފައެވެ. އޭގެ ފަހުން އަންނަ ދައުރުގައި ހޮޅުދޫއަށް ކޮށްދިނުމަށް ހަމަޖެހިފައިވާ ކަންކަން ފާހަގަކުރައްވަމުން ރައީސް ވިދާޅުވީ، އެ ރަށް ޖެހިގެން އޮތް ހޮޅުމީދޫ އެ ރަށުގެ އިހްތިސާސް ތެރެއަށް ލާފައިވާ ކަމަށާއި، އެ ރަށުގައި އަސާސީ ހިދުމަތްތައް ތަރައްގީކޮށް ހޮޅުދޫ ރައްޔިތުންނަށް އާބާދު ވެވޭނެ ގޮތް ހަމަޖައްސަވާނެ ކަމަށެވެ. އަދި، ހޮޅުދޫގައި ރޯހައުސް ނުވަތަ ފްލެޓް އަޅައި، ޒުވާނުންނަށް ސްޕޯޓްސް ކޮމްޕްލެކްސްއެއް އަޅައި އައު ބޮޑު ހުކުރު މިސްކިތެއްވެސް އަޅައިދެއްވާނެ ކަމަށެވެ.
ރައީސް ވަނީ ހޮޅުދޫގެ ރައްޔިތުންގެ ތާއީދު ލިބޭނެ ކަން ޔަގީންކުރައްވާ ކަމަށް ވިދާޅުވެފައެވެ.
