ކ.މާފުށީ ކައުންސިލް މެމްބަރު ނަސީހް މުހައްމަދު އެމްޑީޕީއަށް ސޮއިކޮށްފިއެވެ.
އެމްޑީޕީން ކޮށްފައިވާ ޓުވީޓެއްގައި ބުނީ، މާފުށީ ކައުންސިލް މެމްބަރު ނަސީހް އެ ޕާޓީއަށް ސޮއިކޮށްފާވާ ކަމަށެވެ. އަދި އެމްޑީޕީގެ ރިޔާސީ ކެންޑިޑޭޓް ރައީސް އިބްރާހިމް މުހައްމަދު ސޯލިހުއާ ނަސީހް ބައްދަލުކުރެއްވި ފޮޓޯއެއްވެސް އެ ޕާޓީން ވަނީ އާންމުކޮށްފައެވެ.
މީގެއިތުރުން ނަސީހް ސޯޝަލް މީޑިއާގައި ކޮށްފައިވާ ޕޯސްޓެއްގައި ވިދާޅުވީ، ރައީސް ސޯލިހުގެ ވެރިކަމުގެ މި ދައުރަކީ މާފުށީގެ ދިގު ތާރީހުގައި ދުވަހަކުވެސް ނުދެކޭ ތަރައްގީގެ ދިގު ލިސްޓެއް ހަގީގަތަކަށްވި ފަސް އަހަރު ކަމަށާއި، އަދި ކުރިޔަށް އޮތް ދައުރު ރައީސް ސޯލިހުއަށް ކާމިޔާބުކޮށްދިނުމަށް ބައިވެރިވެފައިވާ ކަމަށެވެ.
އެމްޑީޕީއަށް މެމްބަރުން އިތުރު ކުރުމަށް ކުރާ މަސައްކަތުގެ ދަށުން ޕާޓީއަށް ގިނަ އަދަދެއްގެ މެމްބަރުން އަންނަނީ ސޮއިކުރަމުންނެވެ. އޭގެ ތެރޭގައި މަޖިލިސް މެމްބަރުންނާއި، ކައުންސިލް ރައީސުންނާއި، ކައުންސިލަރުންގެ އިތުރުން ރަށްރަށުގައި ހަރަކާތްތެރިކޮށް އުޅޭ ޒުވާނުން ހިމެނެއެވެ.
