އަންނަ ދައުރުގައި ބ. އޭދަފުށީގައި ހައުސިންގ ޕްރޮޖެކްޓެއް ހިންގައި، އިސްލާމީ މަރުކަޒަކާއި ސްޕޯޓްސް ކޮމްޕްލެކްސްއެއް އަޅައި، ހުރިހާ މަގެއްގައި ތާރު އަޅައި، ހޮސްޕިޓަލް ފެންވަރު މަތިކޮށްދޭނެކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ޞޯލިހު ވައުދުވެވަޑައިގެންފިއެވެ.
ރައީސް މިގޮތަށް ވައުދުވެވަޑައިގެންނެވީ ރިޔާސީ އިންތިހާބަށް ކެމްޕޭން ކުރުމުގެ ގޮތުން ބ. އަތޮޅަށް ކުރައްވަމުން ގެންދަވާ ދަތުރުގެ ތެރެއިން އެ އަތޮޅު އޭދަފުށްޓަށް ވަޑައިގެން މިއަދު ބޭއްވި ބަނދަރު ބައްދަލުވުމުގައި ވާހަކަފުޅު ދައްކަވަމުންނެވެ. އެގޮތުން، އެ ޖަލްސާގައި ރައީސް ވިދާޅުވީ، ރާއްޖޭގެ ތަރައްގީގައި އޭދަފުށްޓަކީ މުހިންމު ރަށެއް ކަމަށެވެ. ތައުލީމީ، ސިއްހީ، ކުޅިވަރު، ވިޔަފާރި، އަދި ސިޔާސީ ދާއިރާ ކަމުގައިވިޔަސް، އިސް ސަފުގައި އޭދަފުށީ ރައްޔިތުންގެ ހިއްސާ އެބައޮތް ކަމަށާއި، ރާއްޖޭގެ ތަރައްގީއަށް ކުރާ މަސައްކަތުގައި ކުރީ ސަފުގައި އޭދަފުށީގެ ނަން އެބަ އޮތް ކަމަށެވެ.
އެންމެ ފުރަތަމަ ސިއްހީ މަރުކަޒުވެސް، ފުރަތަމަ ކޮމިއުނިޓީ ސްކޫލްވެސް މާލެ ފިޔަވައި ހުޅުވުނީ އޭދަފުށީގައި ކަން ފާހަގަކުރައްވަމުން ރައީސް ވިދާޅުވީ، އޭގެ އިން ދައްކުވައިދެނީ ރަށުގެ ތަރައްގީއަށް ރައްޔިތުން ވިސްނާ ވިސްނުންކަމަށެވެ. ތަރައްގީއަށް ކުރާ ކޮންމެ މަސައްކަތެއްގައިވެސް އޭދަފުށީ ރައްޔިތުން ބައިވެރިވެއެވެ. މިއަދު، އެ ތަރައްގީ ދެންވެސް އަންނާނީ އެމްޑީޕީއާ އެކު އޮވެގެންކަން މިހާރު ރައްޔިތުން ގަބޫލުކުރާ ކަމަށްވެސް ރައީސް ވިދާޅުވިއެވެ.
އަންނަ ދައުރުގައި އޭދަފުށްޓަށް ކޮށްދިނުމަށް ހަމަޖެހިފައިވާ ކަންތައްތަކަށް އަލިއަޅުއްވާލައްވަމުން ރައީސް ވިދާޅުވީ، އެ ރަށުގެ ހުރިހާ މަގެއް ތާރު އަޅައި ޒަމާނީ ފެންވަރަށް ހަދައިދޭނެ ކަމަށެވެ. ވޭތުވެދިޔަ 5 އަހަރު ސިއްހީ މަރުކަޒަށް ބޮޑެތި ބަދަލުތައް ގެނެސް، އަތޮޅު ހޮސްޕިޓަލަކުން ލިބޭނޭ އެންމެ ގިނަ ހިދުމަތް މިހާރު އޭދަފުށިން ލިބޭއިރު، އަންނަ ދައުރުގައިވެސް ހޮސްޕިޓަލަށް ބޮޑެތި ބަދަލުތަކެއް ގެނެސްދޭނެކަމަށްވެސް ރައީސް ވަނީ ވައުދުވެވަޑައިގެންފައެވެ. އަދި، ކުރިއަށް އޮތް ދައުރުގައި އެ ރަށު ރައްޔިތުންނަށް ރަނގަޅު ބޮޑު ހައުސިންގ ޕްރޮޖެކްޓެއް ހިންގައި، ރޯހައުސް ނުވަތަ ފްލެޓް އަޅާނެ ކަމަށާއި، ހުޅަނގު ދެކުނު ފަރާތުގައި މޫދަށް އެރެވޭނެ ބީޗެއްވެސް ހަދައިދެއްވާނެ ކަމަށެވެ. އޭދަފުށީގައި އިތުރު ބަނދަރެއް ހެދުމުގެ އަމަލީ މަސައްކަތްވެސް ކުރިއަށް އޮތް ދެތިން މަސް ތެރޭގައި ފެށޭނެއެވެ.
އޭދަފުށްޓަކީ ކުޅިވަރުގެ ރޮނގުގައިވެސް ނަން ހިނގާ ރަށެއް ކަމުން، ވަސީލަތްތައް ގިނަ ރަނގަޅު ސްޕޯޓްސް ކޮމްޕްލެކްސްއެއްވެސް އަންނަ ދައުރުގައި އަޅައިދިނުމަށް ހަމަޖެހިފައިވާކަންވެސް ރައީސް ވަނީ އިއުލާން ކުރައްވާފައެވެ. އަދި، އިސްލާމީ މަރުކަޒެއް އަޅައި ދީނުމަށް ހަމަޖެހިފައިވާކަން ރައީސް ވަނީ ވިދާޅުވެފައެވެ.
މިއަދު ބޭއްވި ބަނދަރު ބައްދަލުވުމުގައި ރައީސް ވިދާޅުވީ، އިރާދަކުރެއްވިއްޔާ މި ދައުރު ނިމޭ އިރު އަސާސީ ހިދުމަތް ނުލިބޭ އެއްވެސް ރަށެއް ނޯންނާނެ ކަމަށާއި، ދެން އޮންނާނީ ރަށު ރައްޔިތުން ބޭނުން މިސްރާބަކަށް ރަށް ތަރައްގީކުރުން ކަމަށެވެ.
