އަންނަ ދައުރުގައި ރ. އިންނަމައިދޫގައި ރޯހައުސް ނުވަތަ ފްލެޓް އަޅައި، ސިއްހީ މަރުކަޒު ވަސީލަތް އިތުރުކޮށް 24 ގަޑިއިރު ބަދަލުކޮށް، ބޮޑެތި މަގުތަކުގައި ތާރުއަޅައި، ޔޫތު ސެންޓަރެއްވެސް އަޅައިދޭނެކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ޞޯލިހު ވައުދުވެވަޑައިގެންފިއެވެ.
ރައީސް މިގޮތަށް ވައުދުވެވަޑައިގެންނެވީ ރިޔާސީ އިންތިހާބަށް ކެމްޕޭން ކުރުމުގެ ގޮތުން ރ. އަތޮޅަށް ކުރައްވަމުން ގެންދަވާ ދަތުރުގެ ތެރެއިން އެ އަތޮޅު އިންނަމައިދޫއަށް ވަޑައިގެން މިއަދު ބޭއްވި ޖަލްސާގައި ވާހަކަފުޅުދައްކަވަމުންނެވެ. އެގޮތުން، އެ ޖަލްސާގައި ރައީސް ވިދާޅުވީ، ވޭތުވެދިޔަ ފަސް އަހަރުގެ ތެރޭގައި ކުރީގެ ސަރުކާރު ތަކުން އަޅާނުލާ ހުރި ގިނަ ރަށްތަކާއި އަސާސީ ހިދުމަތް ފޯރުނުކޮށްދީ ހުރި ގިނަ ރަށްތަކަށް މިހާރު އެ ހިދުމަތްތައް ދެވެން ފެށިފައިވާކަމަށެވެ. އެގޮތުން، އެކަން ކުރެވުނީ ކުރީ ސަރުކާރުތަކުން ބައެއް ރަށްރަށުގައި ފަށާފައިހުރި މަޝްރޫއުތައް ކުރިއަށް ގެންގޮސް ނިންމައިގެން ކަމަށާއި، ސަރުކާރު ބަދަލުވިޔަސް މަޝްރޫއުތައް ކުރިއަށް ގެންދަން ވާނެ ކަމަށެވެ.
އެހެންނަމަވެސް، އެ ސަރުކާރުން ގިނަ ކަންކަން ކުރީ ޕްލޭނެއް ނެތި ކަމަށާއި، އެގޮތުން އިންނަމާދޫގެ ނަރުދަމާ އަކީވެސް އެފަދަ މަޝްރޫއުއެއް ކަމަށެވެ. އެ މަޝްރޫއުގައި ހުރި މައްސަލަތައް ހައްލުކޮށް މިހާރު ނިމިފައިވާ ކަމަށާއި، މުޅިން އަލަށް ފަށައިގެން އިންނަމާދޫ ފެނުގެ ނިޒާމުވެސް މިހާރު ނިންމާފައިވާ ކަމަށެވެ.
މީގެއިތުރުންވެސް، ވަޑިން ހިމެނޭހެން އެންމެ ކުޅަދާނަ މަސައްކަތްތެރިން ތިބީ އިންނަމާދޫގައިކަން ފާހަގަކުރައްވަމުން ރައީސް ވިދާޅުވީ، އަންނަ ދައުރުގައި މިފަދަ މަސައްކަތްތެރިންނަށް ފަސޭހައިން ލޯނު ލިބޭނެ ގޮތެއްވެސްް ހަމަޖައްސައިދެއްވާނެ ކަމަށެވެ. އަދި، ފައިބަރުގެ މަސައްކަތް ކުރައްވާ ރަށެއްކަމުން އެ މަސައްކަތް ކުރައްވާ ފަރާތްތަކުގެ އެދުމުގެ މަތިން ވަންދޫއިން ބިން ހަމަޖައްސައިދިނުމުގެ މަސައްކަތްވެސް ކުރައްވަމުން އަންނަ ކަމަށާއި، ވަރަށް ކައިރި މުސްތަގްބަލެއްގައި އެކަމަށް ހައްލެއް ހޯދައިދޭނެކަމުގެ ޔަގީންކަން ރައީސްވަނީ މިއަދު އަރުއްވާފައެވެ.
އަންނަ ދައުރުގައި އިންނަމާދޫއަށް ކޮށްދިނުމަށް ހަމަޖެހިފައިވާ ކަންކަން ފާހަގަކުރައްވަމުން ރައީސް ވިދާޅުވީ، ސްކޫލްގެ އޮފީސް އިމާރާތާއެކު ބޭނުންވާ އިތުރު ފެސިލިޓީސް ގާއިމްކޮށް، ޒުވާނުން ކުޅިވަރު ކުޅޭނެ ޔޫތު ސެންޓަރެއްވެސް ގާއިމްކޮށްދެއްވާނެ ކަމަށް ރައީސް ވަނީ ވައުދުވެވަޑައިގެންފައެވެ. އެ ރަށުގެ ބޯހިޔާވަހިކަމުގެ ދަތިކަން ހައްލު ކުރުމަށް، އެކަމަށް ހާއްސަކޮށްގެން ރޯހައުސް ނުވަތަ ފްލެޓް އަޅައިދީ، ސިއްހީ ހިދުމަށް ރަނގަޅު ކުރުމަށް ސިއްހީ މަރުކަޒަށް އިތުރު ވަސީލަތްތަކާއެކު އެކްސްޓެންޝަން އިމާރާތެއް އަޅައި 24 ގަޑިއިރަށް ބަދަލުކޮށް، ބޮޑެތި މަގުތަކުގައި ތާރު އަޅައި ޒަމާނީ ފެންވަރަށް ހަދައިދެއްވާނެ ކަމަށްވެސް ރައީސް ވަނީ ވިދާޅުވެފައެވެ. އެ ރަށު ކައުންސިލް އައު އިމާރާތްވެސް އަޅުއްވާނެ ކަމަށް ރައީސް ވަނީ މިއަދު ވިދާޅުވެފައެވެ.
ރިޔާސީ އިންތިހާބަށް ކެމްޕޭން ކުރުމުގެ ގޮތުން، ރާއްޖޭގެ މީހުން ދިރިއުޅޭ ގިނަ ރަށްތަކަށް މިހާރު ދަތުރުކުރެވިފައިވާއިރު، ރައީސް ވިދާޅުވީ ރައްޔިތުންގެ ކިބައިން ފެންނަނީ ތަރައްގީއާއެކު ކުރިއަށް ދިޔުމުގެ ވިސްނުން ކަމަށެވެ. އެއްބުރުން އިންތިހާބު ކާމިޔާބު ކުރެވޭނެ ކަމުގެ ޔަގީންކަން އެބައޮތްކަމަށްވެސް ރައީސް ވަނީ ވިދާޅުވެފައެވެ.
