އަންނަ ދައުރުގައި ރ. ވާދޫގެ ބިން ހިއްކައި، މަގު ހަދައި، ސިއްހީ މަރުކަޒު 24 ގަޑިއިރަށް ބަދަލުކޮށް، ޕިކްނިކް އައިލެންޑެއް ހަމަޖައްސައިދޭނެކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ޞޯލިހު ވައުދުވެވަޑައިގެންފިއެވެ.
ރައީސް މިގޮތަށް ވައުދުވެވަޑައިގެންނެވީ ރިޔާސީ އިންތިހާބަށް ކެމްޕޭން ކުރުމުގެ ގޮތުން ރ. އަތޮޅަށް ކުރައްވަމުން ގެންދަވާ ދަތުރުގެ ތެރެއިން އެ އަތޮޅު ވާދޫއަށް ވަޑައިގެން މިއަދު ބޭއްވި ޖަލްސާގައި ވާހަކަފުޅުދައްކަވަމުންނެވެ. އެގޮތުން، އެ ޖަލްސާގައި ރައީސް ވިދާޅުވީ، 2018 ވަނަ އަހަރު ނިކުތީ ޖަޒީރާ ރާއްޖެއެއް ގޮތަށް ރާއްޖެ ތަރައްގީ ކުރުމުގެ ވައުދާއެކު ކަމަށެވެ. ވަޒީފާއާއި، ތައުލީމު، އަދި ސިއްހީ ހިދުމަތްވެސް އެމީހަކު ދިރިއުޅޭ ތަނެއް ކައިރިން ހޯދައިދިނުމުގެ އަމާޒާއެކު ނިކުތް އިރު، އެ ވައުދުތަކުގެ 90 އިންސައްތަ ވައުދު ނިމިމުމާއި ކައިރިވެފައިވާކަމަށް ރައީސް ވިދާޅުވިއެވެ.
2018 ވަނަ އަހަރު ވެރިކަމާއި ހަވާލުވިއިރު 140 ރަށެއްގައި ފެނާއި ނަރުދަމާ އަޅަން ޖެހިފައި ހުރި ކަމަށާއި، 152 ރަށެއްގައި އިންޖީނު ބަދަލުކުރަން ޖެހިފައި ހުރި ކަމަށާއި، 125 އަށްވުރެ ގިނަ ރަށުގައި ލަފާފުރުމުގެ ދަތިކަން އޮތްކަމަށް ރައީސް ވިދާޅުވިއެވެ. ކޮވިޑާއި ޔޫކްރެއިން ހަނގުރާމައާއެކުވެސް، ރަނގަޅު ސިޔާސަތުތަކެއް ހިންގުމުގެ ނަތީޖާއަކީ މިއަދު އެކަންކަން ފުރިހަމަ ވެގެން ދިޔުމެވެ.
އަންނަ ދައުރުގައި ވާދޫއަށް ކޮށްދިނުމަށް ހަމަޖެހިފައިވާ ކަންކަން ފާހަގަކުރައްވަމުން ރައީސް ވިދާޅުވީ، އެ ރަށުގެ ބިން ހިއްކައި މަގުތަކުގައި ތާރު އަޅައިދީ، ސްކޫލަށް ބޭނުންވާ ކޮމްޕިއުޓަރ ލެބާއި މަލްޓިޕާޕަސް ހޯލެއް އަންނަ ދައުރުގައި އަޅައިދީ ސްކޫލުގެ ވަސީލަތްތައް އިތުރުކޮށްދޭނެ ކަމަށެވެ. އަދި، އެ ރަށު ފަޅު ތެރޭގައި ޕިކްނިކް އައިލެންޑެއް ހަދައި، އެކި ހަފްލާ ބޭއްވުމަށް ކޮމިއުނިޓީ ސެންޓަރެއްވެސް ގާއިމްކޮށްދިނުމަށް ވަނީ ހަމަޖެހިފައެވެ. ވާދޫ ސިއްހީ މަރުކަޒު 24 ގަޑިއިރަށް ބަދަލުކޮށް، އެ ރަށުން އެޓީއެމްގެ ހިދުމަތް ލިބޭނެ ގޮތްވެސް ހަދައިދިނުމަށް ވަނީ ނިމިފައެވެ.
އެ ރަށުގެ ލޭންޑް ޔޫސް ޕްލޭން މިއަހަރު ޖެނުއަރީ މަހުގެ ތެރޭގައި ޕްލޭނިންގ މިނިސްޓްރީއިން ފާސްކޮށްފައިވާއިރު، މިހާރު އެ ރަށުން ގޯތި ދޫކުރުމަށް އެއްވެސް އުނދަގުލެއްވެސް ދިމާނުވާނެ ކަމަށް ރައީސް ވަނީ ފާހަގަކުރައްވާފައެވެ. ބިން އިތުރުކުރުމަށް ހަމަޖެހިފައިވާއިރު، ގޯތި ދޫކުރުން އަވަސްކުރުމަށް ރައީސް ވަނީ ކައުންސިލްގެ އަރިހުން އެދިފައެވެ.
ވާދޫއަކީ ލޯކަލް ޓޫރިޒަމް ފައްކާ ކުރެވޭނެ ރަށެއް ކަމަށްވެސް ރައީސް ވިދާޅުވިއެވެ. އެގޮތުން، 60 އެނދުގެ ވެލްނެސް ހޮޓަލެއް އެޅުމަށް މިހާރު ޕްލޭން ކުރެވިފައިވާއިރު، ރައީސް ވަނީ ލޯކަލް ޓޫރިޒަމް ފައްކާ ކުރުމަށް ބޭނުންވާ ހުރިހާ އެހީއެއް ފޯރުކޮށްދޭނެ ކަމުގެ ޔަގީންކަން އަރުވާފައެވެ.
