ސްޓޫޑެންޓް ލޯނު އުސޫލެއްގެ ދަށުން މައާފް ކޮށްދެވޭނެ ގޮތްތަކެއް ހޯދަމުންދާ ކަމަށް އެމްޑީޕީ އާއި ގުޅިފައިވާ ޕާޓީތަކުގެ ކެންޑިޑޭޓް ރައީސް އިބްރާހިމް މުހައްމަދު ސޯލިހު ވިދާޅުވެއްޖެއެވެ.
ގަލޮޅުގައި ބޭއްވި އުފާވެރި އަމާންރާއްޖެ ކަންމަތީ ޖަލްސާގައި ރައީސް ސޯލިހު ވިދާޅުވީ، މާލޭގައި ކުރިޔަށް ގެންދިޔަ ދޮރުން ދޮރަށް ހަރަކާތުން ސްޓޫޑެންޓް ލޯނާ ގުޅޭގޮތުން ބައެއް ކަންބޮޑުވުން ދަރިވަރުން ހިއްސާކޮށްފައިވާ ކަމަށާއި، ވަކި އުސޫލެއްގެ ދަށުން ސްޓޫޑެންޓް ލޯން މައާފް ކުރެވޭނެ ގޮތްތަކެއް މިހާރު ހޯދަމުން އަންނަ ކަމަށެވެ.
ސްޓޫޑެންޓް ލޯނަށް ލުއި ގޮތްތަކެއް ހޯދައިދެއްވާނެ ކަމަށް ރައީސް ސޯލިހު މީގެ ކުރިން ވިދާޅުވެފައިވާއިރު، ސްޓޫޑެންޓް ލޯން ވަކި އުސޫލެއްގެ ދަށުން މައާފް ކުރެވޭނެ ގޮތްތަކެއް ހޯދަމުން އަންނަ ކަމަށް ވިދާޅުވެފައި ވަނީ ފުރަތަމަ ފަހަރަށެވެ.
މި އަހަރު ސަރުކާރުން ހުޅުވާލި ސްޓޫޑެންޓް ލޯނަށް ކުރިމަތި ފަރާތްތަކުގެ ތެރެއިން ފުރަތަމަ ފަހަރަށް ޝަރުތު ހަމަވާ ހުރިހާ ފަރާތްތަކަށް ވަނީ ލޯނު ދީފައިވާއިރު، ސަރުކާރުން އަންނަނީ ތައުލީ ޖީލެއް ބިނާކުރުމަށް ގިނަ ކަންތައްތަކެއް ކުރަމުންނެވެ. މިގޮތުން ސަރުކާރުގެ ހިލޭ ޑިގްރީ ޕްގްރާމްގެ ދަށޫން 18،000 އަށްވުރެ ގިނަ ދަރިވަރުން އަންނަނީ ތައުލީމް ހާސިލް ކުރަމުންނެވެ.
