ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ އިތުބާރު ނެތްކަމުގެ މައްސަލައަށް ވޯޓަށް ނާހައި، މަޖިލީހުގެ އިތުރު މަސައްކަތެއް ކުރިޔަށް ނުގެންދެވޭނެ ކަމަށް އެމްޑީޕީ ޕާލިމަންޓްރީ ގްރޫޕްގެ ލީޑަރު ހިތަދޫ އުތުރު ދާއިރާގެ މެމްބަރު މުހައްމަދު އަސްލަމް ވިދާޅުވެއްޖެއެވެ.
ނޫސްވެރިންނަށް މައުލޫމާތު ދެމުން އިއްޔެ އަސްލަމް ވިދާޅުވީ، މަޖިލީހުގެ ރައީސްކަމުގެ މަގާމުން ނަޝީދު ވަކިކުރަން ހުށަހަޅާފައިވާ މައްސަލަ އާދީއްތަ ދުވަހަށް އެޖެންޑާކޮށްފައިވާއިރު، އެ މައްސަލަ ކުރިޔަށް ނުގެންދެވޭނެ ގޮތްތަކެއް ރާވަމުން އަންނަ ކަމަށާއި، ނަމަވެސް އެމްޑީޕީ ޕީޖީން ނިންމާފައި ވަނީ އެ މައްސަލައިގައި ވޯޓަށް ނާހައިފިނަމަ މަޖިލީހުގެ އެއްވެސް މަސައްކަތަކަށް އެއްބާރުލުން ނުދޭ ގޮތަށް ކަމަށެވެ.
މިގޮތުން އަންނަ ނޮވެމްބަރު މަހުގެ 17 ވަނަ ދުވަހު އިންތިހާބީ ރައީސް ޑރ.މުހައްމަދު މުއިއްޒު ހުވާ ކުރައްވާ ރަސްމިއްޔާތުގައި ރައީސް ނަޝީދު މަޖިލީހުގެ ރައީސްގެ ހައިސިއްޔަތުން ހާޒިރުވެއްޖެނަމަ، އިންތިހާބީ ރައީސް ކުރައްވާ ހުވާވެސް ގަބޫލު ނުކުރާނެ ކަމަށްވެސް އަސްލަމް ވަނީ ވިދާޅުވެފައެވެ.
މަޖިލީހުގެ 49 މެމްބަރުން ސޮއިކޮށް އެމްޑީޕީން މަޖިލީހުގެ ރައީސްކަމުގެ މަގާމުން ނަޝީދު ވަކިކުރުމަށް ހުށަހެޅި މައްސަލަ އާދީއްތަ ދުވަހަށް ވަނީ އެޖެންޑާކޮށްފައިވާއިރު، އެ ދުވަހު މައްސަލައިގައި ގޮތެއް ނިންމަންޖެހެއެވެ.
