އިންތިހާބީ ރައީސް ޑރ.މުހައްމަދު މުއިއްޒު ހުވާކުރައްވާ ރަސްމިއްޔާތަށް 22.9 މިލިއަން ރުފިޔާ ހަރަދުވާނެ ކަމަށް ރައްޔިތުންގެ މަޖިލީހުން ބުނެފިއެވެ.
ރައްޔިތުންގެ މަޖިލީހުގެ އޮފިޝަލަކު "ތޭވީސް" އަށް ވިދާޅުވީ، އިންތިހާބީ ރައީސް ޑރ،މުއިއްޒު ހުވާކުރެއްވުމުގެ ރަސްމިއްޔާތަށް ޖުމްހޫރީ މައިދާން ތައްޔާރު ކުރުމަށް ސިފައިންގެ ސިވެކްއާ ހަވާލުކޮށްފައިވާ ކަމަށާއި، އަދި އެ ކުންފުންޏާ މަސައްކަތް ހަވާލުކުރީ 22.9 މިލިއަން ރުފިޔާއަށް ކަމަށެވެ.
"ރަސްމިޔާތު ބާއްވާ ދުވަހުގެ ހަފްލާގެ ހުރިހާ މަސައްކަތްތަކާއި، ރަސްމިޔާތުގެ ކޭޓަރިން އިން ފެށިގެން ހަފްލާގެ ހުރިހާ ކަމެއް އިންތިޒާމުކުރާނީ ސިވެކްއިން" މަޖިލީހުގެ އޮފިޝަލް ވިދާޅުވިއެވެ.
އަންނަ ނޮވެމްބަރު މަހުގެ 17 ވަނަ ދުވަަހު ޑރ.މުއިއްޒު ހުވާކުރެއްވުމުގެ ރަސްމިއްޔާތު ޖުމްހޫރީ މައިދާނުގައި ބޭއްވުމަށް ނިންމާފައި ވަނީ އެމަނިކުފާނުގެ އެދުމުގެ މަތިންނެވެ. އަދި ރަސްމިއްޔާތަށް ޖުމްހޫރީ މައިދާން ތައްޔާރު ކުރުމަށް ވަށައިގެން ފެންސް ޖަހައި، ތައްޔާރު ކުރުމުގެ މަސައްކަތް މިހާރު ވަނީ ފަށާފައެވެ.
