ޔޫއޭއީއަށް ކުރެއްވި ނުރަސްމީ ދަތުރުފުޅަށްފަހު އިންތިހާބީ ރައީސް ޑރ.މުހައްމަދު މުއިއްޒު ރޭ ރާއްޖެ ވަޑައިގެންފިއެވެ.
ކުއްލި ގޮތަކަށް ޑރ.މުއިއްޒު ޔޫއޭއީއަށް ވަޑައިގެންނެވީ މިދިޔަ ހޯމަ ދުވަހު ޕްރައިވެޓް ޖެޓެއްގައެވެ. އެމަނިކުފާނުގެ ތަރުޖަމާން މުހައްމަދު ފިރުޒުލް އަބްދުﷲ ހަލީލް ވިދާޅުވީ، ޑރ.މުއިއްޒު ޔޫއޭއީއަށް ވަޑައިގެންނެވީ ނުރަސްމީ ދަތުރުފުޅެއްގައި ކަމަށާއި، ދަތުރުފުޅުގެ ހަރަދުތައް ހަމަޖެއްސެވީ ޔޫއޭއީ ސަރުކާރުން ކަމަށެވެ.
ޑރ.މުއިއްޒު ވަނީ މިދިޔަ ހަފްތާގައި ސިންގަޕޫރަށް ފަސް ދުވަހަށް ވަޑައިގެންފައެވެ. އެ ދަތުރުފުޅަކީވެސް އެމަނިކުފާނު ކުރެއްވި ނުރަސްމީ ދަތުުރުފުޅެއްކަން ފާހަގަކޮށްލެވެއެވެ.
އިންތިހާބީ ރައީސް ޑރ.މުއިއްޒު ހުވާ ކުރެއްވުމުގެ ރަސްމިއްޔާތު އޮންނާނީ މި މަހުގެ 17 ވަނަ ދުވަހުއެވެ. މިގޮތުން ޑރ.މުއިއްޒު ހުވާ ކުރެއްވުމުގެ ރަސްމިއްޔާތަށް ޖުމްހޫރީ މައިދާން އަންނަނީ ތައްޔާރު ކުރަމުންނެވެ.
