ރައީސް ޑރ.މުހައްމަދު މުއިއްޒުގެ ވަޒީރުންގެ މަޖިލީހުގައި ހިމެނިވަޑައިގަންނަވާ ބައެއް ވަޒީރުންނަށް ރުހުން ނުދޭން އެމްޑީޕީ ޕާލަމަންޓްރީ ގްރޫޕްގައި ރޭ މަޝްވަރާކޮށްފިއެވެ.
"ތޭވީސް" އަށް މައުލޫމާތު ދެއްވަމުން އެމްޑީޕީ ޕީޖީ ގްރޫޕްގެ މެމްބަރަކު ވިދާޅުވީ، ރޭގެ ބައްދަލުވުމަކީ ވަޒީރުންނަށް ރުހުން ދިނުމާ ގުޅޭގޮތުން ބޭއްވި މަޝްވަރާ ބައްދަލުވުމެއް ކަމަށާއި، އެ ބައްދަލުވުމުގައި ބައެއް ވަޒީރުންނަށް ރުހުން ނުދޭން މެމްބަރުންގެ ތެރޭގައި ރޫހް ހުރި ކަމަށެވެ.
މެމްބަރުންގެ ތެރޭގައި އެންމެ ބޮޑަށް ކަންބޮޑުވުންތައް ހުރީ ހައުސިން މިނިސްޓަރު ކަމަށް އައްޔަންކުރައްވާފައިވާ ޑރ. އަލީ ހައިދަރުއާމެދު ކަމަށާއި، އޭނާއަށް ރުހުން ނުދިނުމަށް ގިނަ މެމްބަރުން މަޝްވަރާކުރައްވާފައިވާ ކަމަށާއި، އަދި ހޯމް މިނިސްޓަރުގެ އަލީ އިހުސާން އާއި ޓޫރިޒަމް މިނިސްޓަރު އިބްރާހީމް ފައިސަލްއަށްވެސް ރުހުން ނުދޭން ބައެއް މެމްބަރުން މަޝްވަރާކުރެއްވި ކަމަށެވެ.
"ރޭގެ ބައްދަލުވުމަކީ ވަޒީރުންގެ މަޖިލީހަށް އައްޔަން ކުރެއްވި ވަޒީރުންނަށް ރުހުން ދިނުމާ ގުޅޭގޮތުން ބޭއްވި ބައްދަލުވުމެއް. ބައްދަލުވުމުގައި ގޮތްތަކެއް އަދި ނިންމާފައެއް ނުވޭ. އަދި އިތުރަށް ދެ ތިން ބައްދަލުވުމެއް ބޭއްވުމަށްފަހު ގޮތެއް ނިންމާނީ. ގިނަ ވަޒީރުންތަކަށް ރުހުން ދޭން ރޫހް ހުރީ. ނަމަވެސް އެބަތިބި ރުހުން ޔަގީނުންވެސް ނުދޭނެ ދެތިން ވަޒީރުން" ތޭވީސްއަށް މައުލޫމާތު ދެއްވި މެމްބަރު ވިދާޅުވިއެވެ.
ވަޒީރުންގެ މަޖިލީހަށް އައްޔަން ކުރައްވާފައިވާ ބައެއް ބޭފުޅުންނާ ގުޅޭގޮތުން ކަންބޮޑުވުންތަކެއް ހުރި ކަމަށް އެމްޑީޕީގެ މެމްބަރުން މީގެ ކުރިންވެސް ވަނީ ވިދާޅުވެފައެވެ. ހާއްސަކޮށް ހައުސިން މިނިސްޓަރާ ގުޅޭގޮތުން ގިނަ ކަންބޮޑުވުންތަކެއް އެމްޑީޕީ މެމްބަރުން އަންނަނީ ފާޅުކުރައްވަމުންނެވެ.
