ގެދޮރުވެރިޔާ ސްކީމްގެ ދަށުން ދޫކުރި ފްލެޓްތަކާ ގުޅޭގޮތުން އެންޓި ކަރަޕްޝަން ކޮމިޝަން (އޭސީސީ) އިން ކުރައްވާ ތުހުމަތުތަކަކީ ސިޔާސީ ކުލަ ޖެހިފައިވާ ތުހުމަތުތަކެއް ކަމަށް ހައުސިންގެ ކުރީގެ ސްޓޭޓް މިނިސްޓަރު އަދި ފްލެޓް ކޮމިޓީގެ ކުރީގެ ޗެއާޕާސަން އަކްރަމް ކަމާލުއްދީން ވިދާޅުވެއްޖެއެވެ.
އަކްރަމް ކުރެއްވި ޓުވީޓެއްގައި ވިދާޅުވީ، ފްލެޓްތަކަށް ޝަރުތު ހަމަވާކަށް، މާލޭގައި ވަޒީފާ އަދާކުރާ ފަރާތަކަށް ވާކަށް ނުޖެހޭ ކަމަށާއި، ރަށެއްގައި ނުވަތަ ރިސޯޓެއްގައި ކޮންމެ ވަޒީފާއެއް އަދާކުރިނަމަވެސް އެފަރާތުގެ އަނބިދަރިން މާލޭގައި ދިރިއުޅޭނަމަ ޝަރުތު ހަމަވާނެ ކަމަށެވެ.
"ޝަރުތުހަމަ ނުވާފަރާތަކަށް ގިނައިން ޕޮއިންޓް ދީގެން ޝަރުތުހަމައެއް ނުކުރެވޭނެ. އޭސީސީން ކުރައްވާ ތުހުމަތުތަކަކީ ސިޔާސީ ކުލަޖެހިފައިވާ ތުހުމަތެއް، އެހެނީ އެކަން ރަގަޅަށް ތަހުޤީގު ނުކުރައްވާ އެހެން ހާމަކުރެއްވުމަކީ މިދެންނެވި ސިޔާސީ ކުލަޖެހުން" އަކްރަމް ކުރެއްވި ޓުވީޓްގައި ވިދާޅުވިއެވެ.
މީގެއިތުރުން ސިސްޓަމް ސްކޯ އަކާ ވެރިފިކޭސަން ސްކޯއެއް ނީންނާނެކަން ފާހަގަކުރައްވާ އަކްރަމް ވިދާޅުވީ، ސިސްޓަމުން ދައްކަނީ އެޕްލިކަންޓް ނަގާފައިން އޮޕްޝަން ކަމަށާއި، ވެރިފަޔާރ ޑިސައިޑް ކުރަނީ ފޯމުގަ ދީފަހުރި މައުލޫމާތައްބަލައި އޮޕްޝަން ނަގާފަ އިނީ ރަނގަޅަށްތޯ ކަމަށެވެ. އަދި ރަނގަޅު ނޫންނަމަ ފޯމުގެ މައުލޫމާތައް ބަލައި ވެރިފަޔަރ އޮޕްޝަން ޑިސައިޑްކުރާނެ ކަމަށް އަކްރަމް ވިދާޅުވިއެވެ.
ކުރީގެ ރައީސް އިބްރާހިމް މުހައްމަދު ސޯލިހުގެ ވެރިކަމުގެ ދައުރު ނިމުމުގެ ކުރިން ގެދޮރުވެރިޔާ ސްކީމްގެ ދަށުން ފްލެޓް ދޫކޮށްފައިވާއިރު، އެ ފްލެޓްތައް ދޫކުރުން އޭސީސީން ވަނީ ހުއްޓުވާފައެވެ.
