އައްޑޫ ސިޓީގައި ހިންގި ދެ ގްރޫޕް މާރާމާރީއާ ގުޅިގެން އިތުރު ދެ މީހުން ހައްޔަރު ކޮށްފައިވާ ކަމަށް ފުލުހުން ބުނެފިއެވެ.
ފުލުހުން ބުނީ، އައްޑޫ ސިޓީ ހިތަދޫގައި އިއްޔެ ހިންގި މާރާމާރީއާ ގުޅިގެން ކޯޓު އަމުރެއްގެ ދަށުން 22 އަހަރުގެ ފިރިހެނަކު ހައްޔަރު ކޮށްފައިވާ ކަމަށާއި، އަދި ހޮނިހިރު ދުވަހު ހިތަދޫގައި ހިންގި މާރާމާރީއާ ގުޅިގެން ކޯޓު އަމުރެއްގެ ދަށުން މިއަދު 23 އަހަރުގެ ފިރިހެނަކު ހައްޔަރު ކޮށްފައިވާ ކަމަށެވެ.
ހޮނިހިރު ދުވަހުގެ މާރާމާރީއާ ގުޅިގެން 18 އަހަރާއި، 19 އަހަރާއި، 20 އަހަރު އަދި 23 އަހަރުގެ މީހަކު އިއްޔެ ވަނީ ހައްޔަރުކޮށްފައެވެ. މިގޮތުން އެ މާރާމާރީއާ ގުޅިގެން މިހާތަނަށް ފަސް މީހަކު ވަނީ ހައްޔަރުކޮށްފައެވެ.
ހިތަދޫގައި ގްރޫޕް މާރާމާރީތައް އިތުރުވެފައިވާއިރު، މިހާތަނަށް ޒަހަމްކޮށްލި ދެ ޒުވާނުންނަށް ހޮސްޕިޓަލުގައި އަންނަނީ ފަރުވާ ދެމުންނެވެ. މި މާރާމާރީގެ މައްސަލަތައް ބަލަމުން އަންނަ ކަމަށް ފުލުހުން ވަނީ ބުނެފައެވެ.
