ފައިލޭރިއާއަށް ޕޮޒިޓިވް އިތުރު ކޭސްތަކެއް މާލެ ސަރަހައްދުން ފެނިފައިވާ ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ބުނެފިއެވެ.
އެޗްޕީއޭއިން ބުނީ، ކުޅުދުއްފުށީގައި ހިންގުނު ބިދޭސީ މަސައްކަތްތެރިންގެ ސްކްރީނިންގެ ތެރެއިން ފައިލޭރިއާއަށް ޕޮޒިޓިވް ކޭސްއެއް ފެނުމާ ގުޅިގެން، ދުނިޔޭގެ ސިއްހަތު ޖަމިއްޔާގެ ލަފާގެ މަތިން ކުރެވެމުންދާ ހާއްސަ މަސައްކަތުގެ ތެރެއިން ބައްޔަށް ޓެެސްޓު ކުރުމުގެ ތެރޭގައި ޕޮޒިޓިވް ކޭސްތަކެއް ފެނިފައިވާ ކަމަށެވެ.
މި މަހުގެ 22 އަދި 23 ވަނަ ދުވަހު ފައިލޭރިއާއަށް ޓެސްޓް ކުރުމުގެ މަސައްކަތް ކުރިއަށް ގެންދެވިފައި ވަނީ ހުޅުމާލެ، ވިލިމާލެ، ގުޅީފަޅު، ތިލަފުށި އަދި މާލޭގެ ސަރަހައްދުތަކުގައެވެ. އެގޮތުން މައިގަނޑު ގޮތެއްގައި ޓެސްޓު ކުރަން ކުރިއަށް ގެންދެވިފައި ވަނީ ބިދޭސީ މަސައްކަތްތެރިން މަސައްކަތްކުރާ ސައިޓުތަކުގައި ކަމަށް އެޗްޕީއޭއިން ބުނެއެވެ.
އެޗްޕީއޭއިން ބުނީ، ހުޅުމާލެ، ވިލިމާލެ، ގުޅީފަޅު، ތިލަފުށި އަދި މާލޭގައި ޓެސްޓުކުރި 89 މީހުންގެ ތެރެއިން ހަތް މީހަކު ފައިލޭރިއާއަށް ޕޮޒިޓިވްވެފައިވާ ކަމަށެވެ. އެއީ ހުޅުމާލެއިން ފަސް މީހަކާއި، ގުޅީފަޅު އަދި މާލެއިން އެކަކެވެ.
ކުޅުދުއްފުށިން ފައިލޭރިއާއަށް ޓެސްކުރި 439 މީހުންގެ ތެރެއިން 25 މީހުން ޕޮޒިޓިވްވެފައިވާއިރު، މާލެ ސަރަހައްދާއި ކުޅުދުއްފުށި ހިމަނައިގެން ފައިލޭރިއާ ޖެހުނު މީހުންގެ އަދަދު މިހާރު ވަނީ 32 އަށް އަރާފައެވެ.
މިހާތަނަށް ކުރި ޓެސްޓުތަކުން ފައިލޭރިއާއަށް ދިވެއްސަކު ޕޮޒިޓިވް ނުވާއިރު، ޕޮޒިޓީވްވެފައި ވަނީ ބަންގްލަދޭޝް އަދި އިންޑިއާ މީހުންނެވެ. މި ބައްޔަށް ބޭސްފަރުވާގެ ކަންކަން ކުރިޔަށް ގެންދަނީ އެޗްޕީއޭގެ ބެލުމުގެ ދަށުން ކަމަށް އެ އިދާރާއިން ބުނެއެވެ.
