އިލެކްޓްރިކަލް ދާއިރާއަށް އަންހެނުންގެ ޝައުޤުވެރިކަން އިތުރުކޮށް، އަންހެން އިލެކްޓްރީޝަނުން އުފެއްދުމުގެ ބޭނުމުގައި ސްޓެލްކޯއިން ކޯހެއް އިޢުލާނުކޮށްފިއެވެ.
ސްޓެލްކޯއިން ބުނީ ”ބިގިނާސް އިލެކްޓްރީޝަން ކޯސް ފޯ ވިމެން“ ގެ ނަމުގައި ކުރިއަށް ގެންދާ އެ ކޯހަކީ އިލެކްޓްރިކަލް ދާއިރާއަކީ އަންހެނުންނަށްވެސް މަސައްކަތް ކުރެވޭނެ ދާއިރާއެއް ކަމާއިމެދު ހޭލުންތެރިކަން އިތުރުކޮށް، އެ ދާއިރާގައި ފިރިހެނުންނާ އެއް ހަމައެއްގައި މަސައްކަތް ކުރުމުގެ ފުރުސަތު އަންހެނުންނަށް ފަހިކޮށްދިނުން ކަމަށެވެ.
އެންމެ އަސާސީ ލެވެލްއިން ފެށުމަށް ހަމަޖެހިފައިވާ މި ކޯހުގައި މައިގަނޑު ތިން ދާއިރާއަކުން ކިޔަވައިދޭނެއެވެ. އެއީ ރައްކާތެރި ގޮތުގައި ކަރަންޓު ބޭނުންކުރުމާއި، ކަރަންޓަށް ކުރަންޖެހޭ ޚަރަދު ކުޑަކުރުމާއި އަދި ވަޔަރުކުރުމުގެ އަސާސީ މަޢުލޫމާތެވެ.
އާންމުކޮށް ހުޅުވާލައިގެން ހިލޭ ކުރިއަށްގެންދިއުމަށް ހަމަޖެހިފައިވާ މި ކޯހުގައި ބައިވެރިވުމުގެ ފުރުޞަތު 16 އަހަރުންމަތީގެ ހުރިހާ އަންހެނުންނަށް ވަނީ ހުޅުވާލާފައެވެ. އަސާސީ ލެވެލްއިން ފަށާމި ކޯސް ކުރިއަށްދާނީ ޖުމްލަ 4 ދުވަހަށެވެ. ކޮންމެ ދުވަހަކުވެސް 3 ގަޑިއިރު ކިޔަވައިދުމަށް ވަނީ ހަމަޖެހިފައެވެ.
ކޯހުގައި ބައިވެރިވުމުގެ ފުރުޞަތު، 4 ނޮވެންބަރާއި ހަމައަށް ވަނީ ހުޅުވާލާފައެވެ.
