ހުޅުމާލެ، ހުޅުލެ، މާލެ، ވިލިމާލެ ގުޅީފަޅު އަދި ތިލަފުށި ހިމެނޭގޮތަށް، ހަކަތައިގެ ބޮޑު މަޝްރޫޢުއެއް ހިންގުމަށް ސްޓޭޓް އިލެކްޓެރިކް ކޮމްޕެނީ ލިމިޓެޑް (ސްޓެލްކޯ) އިން ޗައިނާގެ ޓީބީއީއޭ ގްރޫޕް ކޮމްޕެނީ ލިމިޓެޑާއެކު ފަހުމުނާމާއެއްގައި ސޮއިކޮށްފިއެވެ.
ޗައިނާގެ އެންމެ ބޮޑު 10 ކުންފުނީގެ ތެރޭގައި ހިމެނޭ ޓީބީއީއޭ ގްރޫޕް ކޮމްޕެނީ ލިމިޓެޑާއެކު ވީ ފަހުމުނާމާގެ ދަށުން އެ ކުންފުންޏާއި ހަވާލުކޮށްފައިވަނީ ޒަމާނީ ހައިބްރިޑް ޓެކްނޮލޮޖީއާއިއެކު ގުޅީފަޅުގައި 150 މެގަވޮޓްގެ 2 އިންޖީނުގެ ޤާއިމްކުރުމަށް ކުރަންޖެހޭ ދިރާސާތައް ކުރުމަށެވެ.
ސްޓެލްކޯގެ ފިފްތު ޕަވަރ މަޝްރޫޢުއެކޭ އެއްގޮތަށް މި މަޝްރޫޢު ނިމުމުން، ގްރޭޓަރ މާލޭ ސަރަޙައްދުގައި ހުރި ރަށްތައް އިންޓަރކަނެކްޝަން ގްރިޑަކުން ގުޅީފަޅުގައި ޤާއިމްކުރެވޭ އިންޖީނުގެތަކާއި ގުޅާލެވޭނެއެވެ. އަދި އޭގެ ސަބަބުން މުޅި ގްރޭޓަރ މާލެ ސަރަޙައްދުގެ ކަރަންޓު ނެޓްވަރކް ވަރުގަދަވެ، ޒަމާނީވެގެންދާނެއެވެ.
ސްޓެލްކޯގެ މެނޭޖިންގ ޑިރެކްޓަރ ޙުސައިން ފަހުމީ ވިދާޅުވީ ގްރޭޓަރ މާލެ ސަރަޙައްދުގައި އިތުރުވަމުންދާ ޑިމާންޑަށް ބަލައި، މި ސަރަޙައްދުގެ ކެޕޭސިޓީ އިތުރުކުރުމަށް މިފަދަ މަޝްރޫޢުތައް ހިންގުމަކީ ކުރީއްސުރެ ކުރަންޖެހިފައިވާ ކަމެއް ކަމަށާއި އަދި މިމަޝްރޫޢުގެ ދަށުން އެކަން ވަރަށް ބޮޑަށް ހާސިލްވާނެ ކަމަށެވެ.
