ޓީޗަރަކު ދަރިވަރުންތަކެއް ގްރޫމްކުރި ކަމަށް ތުހުމަތު ކުރާ މައްސަލައިގައި ދައުވާ ކުރުމަށް ފުލުހުން ޕްރޮސިކިއުޓާ ޖެނެރަލް (ޕީޖީ) އޮފީހަށް މައްސަލަ ފޮނުވައިފި އެވެ.
އޮކްޓޫބަރު 17 ވަނަ ދުވަހު ފުލުހުންނަށް ރިޕޯޓްކުރި މި މައްސަލައާއި ގުޅިގެން 29 އަހަރުގެ ދިވެހި ފިރިހެނަކު ކޯޓު އަމުރެއްގެ ދަށުން ހައްޔަރު ކޮށްފައިވަނީ އޮކްޓޫބަރު 27 ވަނަ ދުވަހު އެވެ.
މިމައްސަލައިގައި ފުލުހުން މިއަދު ބުނެފައިވަނީ އޭނާގެ ބަންދު މުއްދަތު ޖެހުމަށް ކޯޓަށް ހާޒިރު ކުރުމުން 20 ދުވަހަށް ބަންދު ކުރުމަށް އަމުރު ކޮށްފައިވާ ކަމަށެވެ. އަދި އެ މުއްދަތު ހަމަވުމުން ދެވަނަ ފަހަރަށް ކޯޓަށް ހާޒިރު ކުރުމުން 30 ދުވަހަށް ބަންދު ކުރުމަށް އަމުރު ކޮށްފައިވާ ކަމަށެވެ.
ފުލުހުން ބުނެފައިވަނީ މި މައްސަލައިގެ ތަހުގީގު ނިންމާ ނޮވެމްބަރު 25 ވަނަ ދުވަހު ޕީޖީއަށް ފޮނުވާފައިވާ ކަމަށެވެ.
މިކަން ހިނގާފައިވަނީ ރާއްޖޭގެ މެދު ދެކުނު ހިމެނޭ ސަރަހައްދުގަ އެވެ. އެއީ މ، ފ، ދ، ތ އަދި ލ އަތޮޅު ހިމެނޭ ސަރަހައްދެވެ.
