ކުރީގެ ރައީސް އިބްރާހިމް މުހައްމަދު ސޯލިހްގެ މައްޗަށް ޖިނާއީ ތަހުގީގެއް ހިންގުމަށް ރައްޔިތުންގެ މަޖިލީހުން ފާސްކޮށްފައިވަނީ ބިރު ދެއްވަމުން ކަމަށް އެމްޑީޕީގެ ޕާލިމެންޓަރީ ގްރޫޕުން ބުނެފި އެވެ.
އެމްޑީޕީ ޕާލަމެންޓްރީ ގްރޫޕުން މިއަދު ކުރިއަށްގެންދިޔަ ނޫސްވެރިންގެ ބައްދަލުވުމުގައި، ހަނިމާދޫ ދާއިރާގެ މެންބަރު އަބްދުލްޣަފޫރު މޫސާ ވިދާޅުވީ، މާލިއްޔަތު ކޮމިޓީން މި މައްސަލަ ނިންމާފައިވަނީ ފުޅާ ދާއިރާއެއްގައި މަޝްވަރާ ކުރެވިގެން ނޫން ކަމަށެވެ.
ޣަފޫރު ވިދާޅުވީ މިއީ ސިޔާސީ ބޭނުމެއްގައި ކުރާ ކަމެއް ކަމަށާއި މިއީ ބިރުދެއްވުމަށް ހިންގާ ކަމެއް ކަމަށެވެ. އަދި ކުރީ ސަރުކާރުން މިކަމުގައި އަމަލުކޮށްފައިވަނީ ގާނޫނީ ހަމަތަކުގެ މަތިން ކަން ފާހަގަކުރެއްވި އެވެ.
މަޖިލީޙުން މިއަދު ފާސްކުރި މައްސަލައިން އެއްވެސް ކަމެއް ސާބިތެއް ނުކުރެވޭނެ ކަމަށާއި ސާބިތު ކުރެވޭނެ އެއްވެސް ކަމެއް އޮތްނަމަ އެ ބޭފުޅުން މިހާ ދުވަސްވަންދެން ނުތިއްބަވާނެ ކަމަށްވެސް ޣަފޫރު ވިދާޅުވި އެވެ.
ޖިނާއީ ތަހުގީގެއް ހިންގުމަށް ދެންނެވުމަށް މަޖިލީހުން ފާސްކޮށްފައިވަނީ ކުރީގެ ރައީސް އިބްރާޙިމް މުހައްމަދު ސޯލިހް، ރައީސުލްޖުމްހޫރިއްޔާގެ އޮފީހުގެ ކުރީގެ މިނިސްޓަރު އަލީ ސިޔާމް އަދި ކުރީގެ އިކޮނޮމިކް މިނިސްޓަރު ފައްޔާޒް އިސްމާއިލްގެ މައްޗަށެވެ.
މަޖިލީހުގެ މާލިއްޔަތު ކޮމިޓީން ވަނީ، ދައުލަތުން ބަދަލުގެ ގޮތުގައި އެކި ފަރާތްތަކަށް ދީފައިވާ ފައިސާއާގުޅޭ މައްސަލަ ދިރާސާކޮށްފަ އެވެ. އެގޮތުން މާލިއްޔަތު ކޮމިޓީންވަނީ 2019 ވަނަ އަހަރުން 2023 ވަނަ އަހަރާ ހަމައަށް ސޮއިކޮށްފައިވާ ސެޓެލްމަންޓް އެއްބަސްވުންތަކަކީ އުފެދުމުގައިވެސް ބާތިލު އެއްބަސްވުންތަކެއް ކަމުގައި އެކޮމިޓީއަށް ފެންނަ ކަމަށް ފާހަގަ ކޮށްފައިވެ އެވެ.
