ރާއްޖެއިން ތައިލެންޑަށް ކަނޑައަޅުއްވާ ސަފީރު ކަމަށް ފުއާދު ތައުފީގް އައްޔަނުކުރައްވައިފި އެވެ.
ތައިލެންޑް ސަފީރު ކަމަށް މައްޗަންގޮޅި ތަޅަމުދިގެ، ފުއާދު ތައުފީގް އައްޔަނު ކުރައްވާފައިވަނީ މިއަދު އެކަމަށްޓަކައި ރައީސުލްޖުމްހޫރިއްޔާގެ އޮފީހުގައި ކުރިއަށްގެންދިޔަ ރަސްމިއްޔާތުގަ އެވެ.
މިއަދު ބޭއްވި ރަސްމިއްޔާތުގައި ފުއާދުއަށް މަގާމުގެ ލިޔުން އެރުވީ ރައީސް ޑރ. މުހައްމަދު މުއިއްޒު އެވެ.
ސަފީރު ކަމަށް އައްޔަނު ކުރެއްވުމުގެ ކުރިން ފުއާދު ހުންނެވީ މިނިސްޓްރީ އޮފް ފޮރިން އެފެއާޒްގެ އެމްބަސެޑަރ އެޓް ލަރޖްގެ މަޤާމުގަ އެވެ.
ފުއާދު ވަނީ އިލެކްޝަންސް ކޮމިޝަންގައި ދެ ދައުރު ފުރިހަމަ ކުރައްވާފަ އެވެ. އަދި އެކޮމިޝަންގެ ރައީސްކަންވެސް ފުއާދު ކުރައްވާފައިވެ އެވެ.
