ބްރާސްފަތި ދުވަހު ހިނގި އަލިފާނުގެ ހާދިސާގައި ޖިނާއީ ތަހުގީގެއް ހިންގައިދިނުމަށް އެދި މޯލްޑިވިއަން ޑިމޮކްރަޓީކް ޕާޓީ (އެމްޑީޕީ)ގެ ފަރާތުން ފުލުހަށް ހުށަހަޅައިފި އެވެ.
އެމްޑީޕީން މިއަދު ކުރިއަށްގެންދިޔަ ނޫސްވެރިންގެ ބައްދަލުވުމުގައި އެ ޕާޓީގެ ލީގަލް ޑިރެކްޓަރު މަހުފޫޒު ސައީދު ވިދާޅުވީ، ހައުސިން މިނިސްޓްރީގައި ހިނގި އަލިފާނުގެ ހާދިސާއަކީ ރާވައިގެން ކުރި ކަމެއް ގޮތަށް ބެލެވޭ ކަމަށެވެ. އެހެންކަމުން އެކަމުގައި ޖިނާއީ ތަހުގީގެއް ހިންގައިދިނުމަށް އެދި ފުލުހަށް ހުށަހަޅާފައިވާ ކަމަށެވެ. މީގެއިތުރުން މިކަމުގައި އިހުމާލުގެ ގިނަ ކަންކަން ފާހަގަވާތީ އެކަން ނޭޝަނަލް އިންޓެގްރިޓީ ކޮމިޝަން (އެންއައިސީ)އަށްވެސް ހުށަހަޅާނެ ކަމަށް މަހުފޫޒް ވިދާޅުވި އެވެ.
މި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ކެންދޫ ދާއިރާގެ މެންބަރު މައުރޫފް ޒާކިރު ވިދާޅުވީ، އިމަޖެންސީ ޕްރޮކިއުމަންޓުގެ ތެރެއިން ތިން ވުޒާރާ ހިންގުމަށް އަޑި ނޭނގޭ ގޮތަށް ބޮޑެތި ހަރަދުތަކެއް ކޮށްގެން ދަރުބާރުގޭގައި ސެޓަޕް ހަދާފައިވާކަމަށެވެ. އަދި ކައުންސިލްތަކާއި ޕްރޮޖެކްޓުތަކާ ގުޅޭ މައުލޫމާތު ހުރިއިރު އަނދައިދިޔައީ އަދި ސަލާމަތް ކުރެވުނީ ކޯއްޗެއް ކަމެއް މިހާތަނަށް ނޭނގޭ ކަމަށްވެސް ވިދާޅުވި އެވެ.
މަޖިލީހުގެ ކުރީގެ ނައިބުރައީސް އަހުމަދު ސަލީމް މި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ވިދާޅުވީ، އެކަށީގެންވާ ވަގުތު ލިބި އެ އިމާރާތް ސަލާމަތް ނުކުރެވުނީ ކީއްވެގެންތޯ އަދި އެ އިމާރާތުގެ ކްރިޓިކަލް އިންފްރާސްޓްރަކްޗާ ރައްކާތެރި ނުކުރެވުނީ ކީއްވެގެންތޯ ސުވާލު އުފެދޭ ކަމަށެވެ.
