ބްރާސްފަތި ދުވަހު ހިނގި އަލިފާނުގެ ހާދިސާއާއި ގުޅިގެން މަޖިލީހުގެ ޖަލްސާއެއް ދައުރުން ބޭރުގައި ބާއްވައިދިނުމަށް އެދޭނެ ކަމަށް އެމްޑީޕީން ބުނެފި އެވެ.
އެމްޑީޕީން މިއަދު ކުރިއަށް ގެންދިޔަ ނޫސްވެރިންގެ ބައްދަލުވުމުގައި އެ ޕާލިމެންޓަރީ ގްރޫޕުގެ ލީޑަރު، ހިތަދޫ ދެކުނު ދާއިރާގެ މެންބަރު އިބްރާހިމް ނާޒިލް ވިދާޅުވީ، މި އަލިފާނުގެ ހާދިސާއާއި ގުޅިގެން ރައްޔިތުންގެ ބޮޑެތި ކަންބޮޑުވުންތަކެއް އެބަހުރި ކަމަށެވެ.
އެހެންކަމުން މަޖިލީހުގެ ދައުރުން ބޭރުގައި ޖަލްސާއެއް ބޭއްވުމަށް އެދޭނެ ކަމަށް ނާޒިލް ވިދާޅުވި އެވެ.
ދައުރުން ބޭރުގައި ޖަލްސާ ބޭއްވުމަށް 31 މެންބަރުންގެ ސޮއި ބޭނުންވެ އެވެ. ނާޒިލް ވިދާޅުވީ އެމްޑީޕީގައި 12 މެންބަރުން ތިބުމުން ޕީއެންސީގެ ވެސް އެހީތެރިކަމަށް މިކަމުގައި އެދޭނެ ކަމަށެވެ.
މަޖިލީހުގެ ގަވައިދުގައި ބުނެފައިވާގޮތުން، ދައުރުން ބޭރުގައި ޖަލްސާއެއް ނުވަތަ ޖަލްސާތަކެއް ބާއްވަން މަޖިލީހުގެ ތިންބައިކުޅަ އެއްބައި މެންބަރުން ސަބަބު ބަޔާންކޮށް ސޮއިކޮށް ރައްޔިތުންގެ މަޖިލީހުގެ ރައީސަށް ހުށަހަޅަންޖެހެ އެވެ.
