ގޯތި ލިބިފައި ނުވާ ބަޔަކަށް ހުޅުމާލެއިން ބިންދީފައިވާ މައްސަލައިގައި ހައުސިން މިނިސްޓަރު ޑރ. އަލީ ހައިދަރު ޒިންމާވާންޖެހޭ ކަމަށް އެމްޑީޕީން ބުނެފި އެވެ.
ކުރީގެ ރައީސް އިބްރާހިމް މުހައްމަދު ސޯލިހްގެ ވެރިކަމުގައި މާލެއިން ގޯރި ދޫކުރުމަށް ހުޅުވާލި ބިންވެރިޔާ ސްކީމްގެ ލިސްޓުގައި ނުހިމެނޭ ފަރާތްތަކަށް ގޯއްޗެއް ދިން ކަމަށް ބުނާ މައްސަލަ އިއްޔެ ވަނީ ފެންމަތިވެފަ އެވެ. ބިންވެރިޔާ ސްކީމަށް ޝަރުތު ހަމަނުވާ އެމްޑަބްލިއުއެސްސީގެ ޑެޕިއުޓީ މެނޭޖިން ޑިރެކްޓަރު، މުހައްމަދު ފަޒީލް ރަޝީދަށް ގޯތީގެ ރެޖިސްޓްރީއެއް ހަދައިފައިވާ މައްސަލައެއް ފެންމަތިވެ ފުލުހުން އަންނަނީ މި މައްސަލަ ތަހުގީގު ކުރަމުންނެވެ. ފަޒީލް ރަޝީދަކީ އެޗްޑީސީގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދުގެ ބޭބެ އެވެ.
މިމައްސަލައިގައި އިދިކޮޅު މޯލްޑިވިއަން ޑިމޮކްރަޓިކް ޕާޓީ (އެމްޑީޕީން) ކުރިއަށްގެންދިޔަ ނޫސްވެރިންގެ ބައްދަލުވުމުގައި ހައުސިން މިނިސްޓްރީގެ ކުރީގެ ސްޓޭޓް މިނިސްޓަރު އަކްރަމް ކަމާލުއްދީން ވިދާޅުވީ މިމައްސަލައިގައި މިހާރުގެ ހައުސިން މިނިސްޓަރު ހައިދަރަށް ފިޔަވަޅު އަޅަންޖެހޭ ކަމަށެވެ.
އަކްރަމް ވިދާޅުވީ މިކަމުގެ ހުރިހާ ތަފްސީލެއް ހައިދަރަށް އެނގިވަޑައިގަންނަވާނެ ކަމަށާއި، ޕްލޮޓްތަކުގެ ނަމްބަރުތަކާއި ހުސްކޮށް ހުރި ޕްލޮޓްތަކުގެ މައުލޫމާތު ހައުސިން މިނިސްޓްރީން ނުދޭހާހިނދަކު އެޗްޑީސީއަށް ނޭންގޭނެ ކަމަށެވެ.
މިމައްސަލައާއި ގުޅިގެން އަކްރަމް ވަނީ ހައުސިން މިނިސްޓަރު ޑރ. ހައިދަރުގެ އިސްތިއުފާއަށް ގޮވާލައްވާފަ އެވެ. އަދި ވަގުތުން ވަގުތަށް ރައީސް ޑރ. މުހައްމަދު މުއިއްޒު، މިނިސްޓަރު ހައިދަރު ސަސްޕެންޑް ކުރަންޖެހޭ ކަމަށްވެސް ވިދާޅުވި އެވެ.
މިއަދުގެ މި ނޫސްވެރިންގެ ބައްދަލުވުމުގައި ކުރީގެ ހައުސިން ކޮމެޓީގެ މެންބަރު މުހައްމަދު އާރިފް ވިދާޅުވީ ފޭކު ރަޖިސްޓްރީއެއް ހަދާ ފަރާތަކަށް ވެސް ޕްލޮޓް ނަންބަރެއް ލިބޭނީ ހައުސިން މިނިސްޓްރީން ކަމަށެވެ.
