ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)ގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދު މަގާމުން އިސްތިއުފާ ދެއްވައިފި އެވެ.
މަގާމުން އިސްތިއުފާ ދެއްވާ ރައީސް ޑރ. މުހައްމަދު މުއިއްޒުއަށް ފޮނުއްވި ސިޓީގައި ފަޒުލް ވިދާޅުވީ، އެޗްޑީސީގެ އެމްޑީގެ މަގާމުގައި ހޭދަކުރި މުއްދަތުގައި އެކިގޮތްގޮތުން އެކި ޕްލެޓްފޯމްތަކުގައި، ކުރިން އަދި މިހާރު ކުރަމުންދާ ތުހުމަތުތަކަށް އިންކާރު ކުރައްވާ ކަމަށެވެ.
ފަޒުލް ވިދާޅުވީ މަގާމާ ހަވާލުވުމަށްފަހު އެޗްޑީސީގެ ފަރާތުން ކޮށްފައިވާ އެންމެހާ މުއާމަލާތުތަކަކީ ޕޮލިސީތަކުގެ ތެރެއިން، ކުންފުނީގެ މަސްލަހަތު އިސްކޮށްގެން ކޮށްފައިވާ މުއާމަލާތްތަކެއް ކަމަށެވެ.
ބިންވެރިޔާ ސްކީމާ ގުޅިގެން އެޗްޑީސީއަށް އަމާޒުވެފައިވާ ތުހުމަތުތަކަކީ ކުންފުންޏާ އެއްވެސް ގުޅުމެއް ހުރި ކަންތައްތަކެއް ނޫންކަމަށް ފަޒުލްގެ ސިޓީގައި ވިދާޅުވެފައިވެ އެވެ.
“އަޅުގަނޑު އެދެނީ އެ ތުހުމަތުތަކުގެ ހަޤީޤަތް ވީ އެންމެ އަވަސް ފުރުސަތެއްގައި ރައްޔިތުންނަށް ހާމަވުމެވެ. އަދި މިކަމުގެ ސަބަބުން ކުންފުންޏާއި ސަރުކާރުގެ ސިޔާސަތުތައް ހުއްޓިފައި އޮންނާކަށް އަޅުގަނޑު ނޭދެމެވެ.”ފަޒުލްގެ ސިޓީގައި ބުނެފައިވެ އެވެ.
މީގެއިތުރުން ފަޒުލް ވިދާޅުވީ، މަގާމުން އިސްތިއުފާ ދެއްވަނީ، ތަހުގީގަށް ފުރުސަތު ދިނުމަށް އަދި ސަރުކާރުގެ ސިޔާސަތުތައް ނުހުއްޓި ކުރިއަށް ގެންދިއުމަށް ފުރުސަތު ދިނުމުގެ ގޮތުން ކަމަށެވެ.
ފަޒުލް މަގާމުން އިސްތިއުފާ ދެއްވާފައިވާއިރު، ބިންވެރިޔާ ސްކީމަށް ޝަރުތު ހަމަނުވާ ފަޒުލްގެ ބޭބެ މުހައްމަދު ފަޒީލް ރަޝީދުގެ ނަން ލިސްޓުގައި ހިމަނައި އޭނާއަށް ގޯތީގެ ރެޖިސްޓްރީއެއް ހަދައިފައިވާ މައްސަލަ އަންނަނީ ތަހުގީގު ކުރަމުންނެވެ.
މި މައްސަލައިގައި ފަޒުލްއާއި އޭނާގެ ބޭބެގެ ޕާސްޕޯޓް އޮތީ ހިފަހައްޓާފަ އެވެ.
