އިންޑިއާއިން އެމްއެންޑީއެފްއަށް ހަތަރު މިލިއަން ޑޮލަރުގެ ޑިފެންސް އިކުއިޕްމަންޓް ހަދިޔާކޮށްފި އެވެ.
ޑިފެންސް މިނިސްޓަރު ޣައްސާން މައުމޫން އިންޑިއާއަށް ކުރައްވަމުން ގެންދަވާ ދަތުރުފުޅުގެ ތެރެއިން މިއަދު ވަނީ އިންޑިއާގެ ޑިފެންސް މިނިސްޓަރު ރާޖުނާތު ސިންގްއާ ބައްދަލުކުރައްވާ ރަސްމީ މަޝްވަރާތައް ކުރިއަށްގެންދަވާފަ އެވެ.
މިނިސްޓަރު ޣައްސާންގެ މި ދަތުރުފުޅާ ގުޅިގެން އިންޑިއާގެ ބައެއް މީޑިއާތަކުން ބުނެފައިވަނީ، ދެ ގައުމުގެ ދެމެދުގައި ކުރިއަށްގެންދިޔަ މަޝްވަރާތަކުގެ މަގުސަދަކީ ދިފާއީ އެއްބާރުލުމާއި، ސަލާމަތީ ކަންކަން ހަރުދަނާކުރުމާއި، މައުލޫމާތު ބަދަލުކުރުމާއި، ތަމްރީނުތަކުގެ ތެރެއިން އެމްއެންޑީއެފްގެ ގާބިލްކަން އިތުރުކުރުމުގެ މަޝްވަރާތައް ކުރިއަށްގެދިޔަ ކަމަށެވެ.
އިންޑިއާގެ މީޑިއާތަކުން ބުނެފައުވަނީ، ރާއްޖޭގެ އެދުމުގެ މަތިން އިންޑިއާއިން އެމްއެންޑީއެފްއަށް 4 މިލިއަން ޑޮލަރުގެ ސަމާނު ހަދިޔާކޮށްފައިވާ ކަމަށެވެ. އޭގެތެރޭގައި ޔުޓިލިޓީ ވެހިކަލްތަކާއި ބަނދަރު ކުރުމަށް ބޭނުންވާ ތަކެތި ހިމެނޭ ކަމަށް ރިޕޯޓް ކޮށްފައިވެ އެވެ.
ޣައްސާން އިންޑިއާއަށް ކުރައްވާ ދަތުރުފުޅަކީ ތިން ދުވަހުގެ މުއްދަތަށް ކުރައްވާ ދަތުރުފުޅެކެވެ. މިއީ ޑިފެންސް މިނިސްޓަރުގެ މަގާމާ ޣައްސާން ހަވާލުވެވަޑައިގެންނެވިފަހުން ޑިފެންސް މިނިސްޓަރުގެ ހައިސިއްޔަތުން އިންޑިއާއަށް ކުރައްވާ ފުރަތަމަ ދަތުރުފުޅެވެ.
