ވައިގެމަގުން ރާއްޖެއަށް އެތެރެކުރަން އުޅުނު މަސްތުވާތަކެތި އަތުލައިގެންފި އެވެ.
ކަސްޓަމްސްއިން ބުނެފައިވަނީ މިތަކެތި އަތުލައިގަނެފައިވަނީ 2025 ޖަނަވަރީ 09 ވަނަ ދުވަހު، އަބޫދާބީ އިން ރާއްޖެއައި އުމުރުން 39 އަހަރުގެ ދިވެހި ފަސިންޖަރެއްގެ އަތުން ކަމަށެވެ.
އޭނާގެ ލަގެޖްގައި މަސްތުވާތަކެތި ރައްކާކޮށްގެން ގެނެސްފައިވާ ކަމަށް ޝައްކުކުރެވިގެން، އިތުރަށް ބަލައިފާސްކުރުމުގެ ތެރޭގައި އޭގެތެރެއިން މަސްތުވާތަކެތި ފެނުނީ ކަމަށް ކަސްޓަމްސްއިން މައުލޫމާތު ދީފައިވެ އެވެ. އޭނާގެ ލަގެޖުން ފެނުނުތަކެތި ތަހުލީލުކުރިއިރު، މަސްތުވާތަކެތީގެ ބާވަތެއް ކަމަށްވާ ހެރޮއިންއަށް ޕޮޒިޓިވް ވެފަވާ ކަމަށްވެސް ބުނެފައިވެ އެވެ.
ކަސްޓަމްސްއިން ބުނެފައިވަނީ މިތަކެތީގެ ބަރުދަނުގައި ޕެކިންއާއި އެކު ޖުމްލަ 109 ގުރާމް ހުރި ކަމަށެވެ. އަދި މިތަކެތީގެ މަގުމަތީ އަގަކީ 109,000.00 ރުފިޔާކަމަށް ލަފާކުރެވޭ ކަމަށެވެ.
މި މީހާ ފުލުހުންނަށް ހަވާލުކުރުމުން ހައްޔަރުކޮށް ބަންދު މުއްދަތު ޖެހުމަށް ކްރިމިނަލް ކޯޓަށް ހާޒިރުކުރުމުން އިއްޔެ ކްރިމިނަލް ކޯޓުން ވަނީ އޭނާގެ ބަންދަށް 15 ދުވަހުގެ މުއްދަތެއް ދީފަ އެވެ.
