މިމަހުގެ 31 ވަނަ ދުވަހު އެމްޑީޕީން ކުރިއަށްގެންދާ ހަރަކާތް ކުރިއަށްގެންދާނީ "ފުދިއްޖެ، ފުނޑިއްޖެ" މިނަމުގައި ކަމަށް އެމްޑީޕީގެ ރައީސް އަބްދުﷲ ޝާހިދު ވިދާޅުވެއްޖެ އެވެ.
އެމްޑީޕީން މިއަދު ކުރިއަށްގެންދިޔަ ނޫސްވެރިންގެ ބައްދަލުވުމުގައި ވާހަކަ ދައްކަވަމުން އެމްޑީޕީގެ ރައީސް އަބްދުﷲ ޝާހިދު ވިދާޅުވީ 31 ޖެނުއަރީގައި އެމްޑީޕީން ކުރިއަށްގެންދާ މަގުމަތީ ހަރަކާތް ކުރިއަށްގެންދާނީ "ފުދިއްޖެ، ފުނޑިއްޖެ" ނަމުގައި ކަމަށެވެ.
31 ޖެނުއަރީ ވާ ހުކުރު ދުވަހު، "ފުދިއްޖެ، ފުނޑިއްޖެ" ނަމުގައި ކުރިއަށްގެންދާ މި ހިނގާލުން ފެށުމަށް ހަމަޖެހިފައިވަނީ ހަވީރު 04:00 ގައި އާޓިފިޝަލް ބީޗުންނެވެ.
ޝާހިދު ވިދާޅުވީ މި ހިނގާލުމާ ގުޅުވައިގެން ކަންމަތީ ބައްދަލުވުންތަކާއި ދޮރުން ދޮރަށް ހަރަކާތްތައް ހިންގާނެ ކަމަށެވެ.
އެމްޑީޕީގެ މި ހަރަކާތުގައި ރާއްޖޭގެ ވީހާވެސް ގިނަ ރައްޔިތުން ބައިވެރިވުމަށް ޝާހިދު ދައުވަތު އެރުވި އެވެ. ސަރުކާރާއި ދެކޮޅަށް މިހާރުަ އަޑު ނުއުފުލާ ހިމޭނުން ތިބެއްޖެނަމަ ކަންކަން އަލުން ހަރުދަނާ ނުކުރެވޭ ހިސާބަށް، ހަރާބުގެ މަގަށް ހިނގައިދާނެ ކަމަށްވެސް ޝާހިދު ވިދާޅުވި އެވެ.
ޤާނޫނާއި ޤާނޫނުއަސާސީއަކީ ކުޅޭކުޅޭ އެއްޗަކަށް މިއަދު ހަދާފައިވާ ކަމަށާއި ރައްޔިތުންގެ ކަންކަން ކޮންޓްރޯލްކުރުމުގެ ވިސްނުން ވެސް ސަރުކާރުން ގެންގުޅޭކަމަށް ޝާހިދު ވިދާޅުވި އެވެ.
