ސްޓެލްކޯ ޓްރާންސްފޯމަރުން ވައްކަންކުރި މީހާ ހުއްޓުވަން އުޅުނު މުވައްޒަފަށް ސްޓެލްކޯގެ "މެޑަލް އޮފް ބްރޭވަރީ" އަރުވާފައި އެވެ.
ހުޅުމާލޭގައި ހުރި ސްޓެލްކޯގެ ޓްރާންސްފޯމަރަކަށް ގެއްލުންދީ އެތަނުން ވައްކަން ކުރަން އުޅުނު މީހަކު ހިފަހައްޓައި ފުލުހުންނާ ހަވާލުކޮށްފައިވަނީ ރޭގެ ވަގުތެއްގަ އެވެ. ޓްރާންސްފޯމަރުން ވައްކަން ކުރަން އުޅުނު މީހާ ހިފަހައްޓަން އުޅުނު ސްޓެލްކޯގެ މުވައްޒަފަށްވެސް ވަނީ ހަމަލާދީފަ އެވެ. އެގޮތުން މުވައްޒަފެއްގެ ގައިގައި ރެންޗަކުން ޖަހާ ބޯފަޅާލާފައިވެ އެވެ.
ސްޓެލްކޯއިން މިއަދު ބުނެފައިވަނީ، ރޭގެ ވަގުތެއްގައި ޓްރާންސްފޯމަރަކުން ވައްކަންކުރަން އުޅުނު ބަޔަކު ހުއްޓުވުމަށް މަސައްކަތްކަތްކުރި މުވައްޒަފުންގެ އަގުވަޒަން ކުރުމުގެ ގޮތުން އެއް މުވައްޒަފަކަށް ސްޓެލްކޯގެ 'މެޑަލް އޮފް ބްރޭވަރީ' އަރުވާފައިވާ ކަމަށެވެ. އަދި އެކަމުގައި ދެން ހަރަކާތްތެރިވި މުވައްޒަފަށް އެކަމުގެ ހަނދާނީ ލިއުމެއް އަރުވާފައިވާ ކަމަށެވެ.
އެ މުވައްޒަފުންގެ އަގުވަޒަންކޮށްފައި މިވަނީ ނުރައްކަލުގެ ވަގުތުގައި ދައްކުވައިދިން ހިތްވަރާއި ކެރުންތެރިކަން ފާހަގަކުރުމުގެ ގޮތުން ކަމަށް ސްޓެލްކޯއިން މައުލޫމާތު ދީފައިވެ އވެެ. އަދި މުވައްޒަފުންގެ ސަލާމަތާއި ރައްކާތެރިކަން ކަށަވަރުކުރުމަށް ސްޓެލްކޯއިން އަބަދުވެސް މަސައްކަތް ކުރާނެ ކަމަށާއި މިފަދަ ހާދިސާތަކަށް ޚާއްސަ ސަމާލުކަމެއް ދީގެން ވަރަށް ޙައްސާސް މައްސަލަތަކެއްގެ ގޮތުގައި ބަލައި، ފިޔަވަޅުއަޅަމުން ދާނެކަމަށް ބުނެފައިވެ އެވެ.
