އިލެކްޝަންސް ކޮމިޝަން (އީސީ)ގެ ހުސްވެފައިވާ މެންބަރުކަމަށް ދެ މެންބަރުން އައްޔަނު ކުރަން މަޖިލީޙުން ފާސްކޮށްފި އެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި އީސީއަށް އައްޔަނު ކުރަން ފާސްކޮށްފައިވަނީ މުހައްމަދު ޒާހިދު އަދި އަބްދުއްރަހްމާން ސަލާހް ރަޝީދު އެވެ.
މި ދެބޭފުޅުން އީސީއަށް އައްޔަނު ކުރަން މަޖިލީހުން ފާސްކޮށްފައިވަނީ ވޯޓުގައި ބައިވެރިވި 68 މެންބަރުންގެ އިއްތިފާގުންނެވެ.
އީސީގެ ދެ މެންބަރުންގެ މަގާމު ހުސްވީ ކޮމިޝަންގެ މެންބަރުންގެ ގޮތުގައި ތިއްބެވި އަލީ ނަޝާތު އަދި މުހައްމަދު އާސިފް މަގާމުން ވަކިކުރުމުންނެވެ.
މުހައްމަދު ޒާހިދުއަކީ ހިއުމަން ރައިޓްސް ކޮމިޝަން (އެޗްއާރްސީއެމް)ގެ ކުރީގެ ނައިބުރައީސް އެވެ. އަދި އަބްދުއްރަހްމާން ސަލާހް ރަޝީދަކީ އީސީގެ ކުރީގެ ސެކެރެޓްރީ ޖެނެރަލް އެވެ.
