ޕެންޝަން އޮފީސް މެދުވެރިކޮށް ސަރުކާރުން ފައިސާ ޗާޕުކުރަން އުޅޭކަމުގެ އަޑުތައް ފެތުރިފައިވަނިކޮށް ޕެންޝަން އޮފީހުގެ އޭރުގެ ޗީފް ފައިނޭޝަލް އޮފިސަރ ހައްވާ ފަޖުވާ އިސްތިއުފާ ދެއްވިފަހުން އެމަޤާމު ހުސްކޮށް އޮތުމަށްފަހު، އެމަޤާމަށް މީހަކު ހޯދުމަށް ޕެންޝަން އޮފީހުން އަނެއްކާވެސް އިއުލާންކޮށްފިއެވެ.
މީގެ ކުރިން ޑިސެމްބަރު މަހުގެ މެދުތެރޭގައިވެސް ޕެންޝަން އޮފީހުން ސީ.އެފް.އޯ އެއް ހޯދުމަށް އިއުލާންކުރިއެވެ. އެހެންނަަވެސް އަނެއްކާވެސް އަލުން މިވަނީ އިއުލާންކޮށްފައެވެ.
ޕެންޝަން އޮފީހުން ކޮށްފައިވާ އިއުލާނުގައި ވަނީ ސީ.އެފް.އޯގެ ވަޒީފާއަށް ފުރަތަމަ ހަމަޖެއްސޭނީ އެއް އަހަރު ދުވަހުގެ މުއްދަތަށްކަމަށެވެ. އެއް އަހަރު ހަމަވުމުން މަސައްކަތުގެ ފެންވަރަށް ބަލައި، ރަނގަޅުނަމަ، ވަޒީފާ ދާއިމީ ކުރެވިދާނެކަމަށާއި، ނުވަތަ ކޮންޓްރެކްޓްގެ މުއްދަތު އިތުރު ކުރެވިދާނެކަމަށް ޕެންޝަން އޮފީހުގެ އިއުލާނުގައިވެއެވެ.
މި ވަޒީފާގެ ފެންވަރު އަދި ޝަރުތުގައި ހިމެނެނީ އެކައުންޓިންގ ނުވަތަ ފައިނޭންސްގެ ރޮނގުން މާސްޓަރސް ޑިގްރީއެއް ޙާޞިލްކޮށްފައިވުން، ނުވަތަ އެއާ އެއްފެންވަރުގެ ޕްރޮފެޝަނަލް ސަނަދެއް ޙާޞިލްކޮށްފައިވުން، ނުވަތަ ACCA / CIMA ގެ މެމްބަރޝިޕް ޙާޞިކޮށްފައިވުމެވެ. އަދި، އެކައުންޓިންގ ނުވަތަ ފައިނޭންސްގެ ދާއިރާއިން ސީނިއަރ މެނޭޖްމަންޓް ލެވެލްގައި މަދުވެގެން 8 އަހަރު ދުވަހުގެ މަސައްކަތު ތަޖުރިބާވެސް ހުންނަން ޖެހެއެވެ.
އެކައުންޓިންގ ނުވަތަ ފައިނޭންސްގެ ރޮނގުން ބެޗެލަރސް ޑިގްރީއެއް އޮތް ފަރާތެއް ނަމަ 10 އަހަރުގެ ތަޖުރިބާއާއެކު މާސްޓަރސް ޑިގްރީއެއް ނެތަސް މި ވަޒީފާއަށް ކުރިމަތިލެވިދާނެއެވެ.
މިވަޒީފާއަށް ކުރިމަތިލުމުގެ ސުންގަޑިއަކީ ފެބްރުއަރީ 1 ވަނަ ދުވަހުގެ ހަވީރު 3:00 އެވެ. މި މަޤާމަށް ޝައުޤުވެރިވާ ފަރާތްތަކުން 1 ފެބުރުވަރީވާ އާދީއްތަ ދުވަހުގެ 3:00 ގެ ކުރިން ޕެންޝަން ޕޯޓަލް (jobs.pension.gov.mv) މެދުވެރިކޮށް އެޕްލިކޭޝަން ހުށަހެޅުމަށް ޕެންޝަން އޮފީހުގެ އިއުލާނުގައިވެއެވެ.
