ފުވައްމުލަކު ސިޓީގެ މަގުތައް ޒަމާނީ ފެންވަރަށް ތަރައްގީ ކުރުމުގެ މަޝްރޫއުގެ ދަށުން 20 މަގުގެ މަސައްކަތް ނިމިފައިވާ ކަމަށް އެމްޓީސީސީން ބުނެފިއެވެ.
އެމްޓީސީސީން ބުނީ، ފުވައްމުލަކުގައި މިވަގުތު 31 މަގު ހަދަމުންދާ ކަމަށާއި، އޭގެ ތެރެއިން 20 މަގެއްގެ މަސައްކަތް އެއްކޮށް ނިމިފައިވާ ކަމަށެވެ.
މީގެއިތުރުން ހަދަމުންދާ 11 މަގެއްގެ 95 އިންސައްތަ މަސައްކަތް ނިމިފައިވާ ކަމަށްވެސް އެމްޓީސީސީން ވަނީ ބުނެފައެވެ.
މި މަޝްރޫއުގެ ދަށުން 122،659 އަކަ މީޓަރު ސަރަހައްދުގައި ސަބް ބޭސް އެޅުމާއި، 95،239 އަކަ މީޓަރު ސަރަހައްދުގައި ތާރު އެޅުމާއި، 27،450 އަކަ މީޓަރު ސަރަހައްދުގައި ޕޭވްމަންޓް ހެދުމާއި، 19،940 އަކަ މީޓަރުގެ ފެން ހިންދާ ނިޒާމެއް ގާއިމުކުރުމުގެ އިތުރުން މަގުމަތީ ނިޝަންތަކާއި، މަގު ބައްތި ހަރު ކުރުމަށް ވަނީ ހަމަޖެހިފައެވެ.
މި މަޝްރޫއަށް ޖުމްލަ 279.4 މިލިއަން ރުފިޔާ ހަރަދުވާނެއެވެ.
