ގައުމީ އެއާލައިން މޯލްޑިވިއަން އިން އޭ 330-200 މަރުކާގެ ދެ ބޯޓު ކުއްޔަށް ނެގުމަށް ނިންމައިފިއެވެ.
މޯލްޑިވިއަން ހިންގާ އައިލޭންޑް އެވިއޭޝަނުން މިއަދު ވަނީ ދެ ބޯޓު ޑްރައި ލީސްކޮށްދޭނެ ފަރާތެއް ހޯދަން ޕްރޮޕޯސަލް ހުށަހެޅުމުގެ ފުރުސަތު ހުޅުވާލައިފައެވެ.
އައިލޭންޑް އެވިއޭޝަނުން މި ބޯޓުތައް ކުއްޔަށް ނަގަން ނިންމާފައި ވަނީ މަދުވެގެން ހަ އަހަރަށް ކަމަށްވާއިރު، މި އަހަރުގެ ފުރަތަމަ ކުއާޓަރު ނުވަތަ ދެވަނަ ކުއާޓަރު ނިމުމުގެ ކުރިން ބޯޓު ރާއްޖެ ގެނެސްދޭން ޖެހޭކަމަށް ވަނީ ޝަރުތުކޮށްފައެވެ.
މީގެއިތުރުން ކުއްޔަށް ނެގުމަށް ނިންމާފައި ވަނީ ބިޒްނަސް އަދި އިކޮނޮމީ ކްލާސް ހިމެނޭ ބޯޓުތަކަށްވާއިރު، ބިޒްނަސް ކްލާހުގައި 25-30 ސީޓު ހުންނަން ޖެހޭނެކަމަށް ވަނީ ޝަރުތުކޮށްފައެވެ
މި ބޯޓުތައް ރާއްޖެ ގެނައުމަށް ނިންމާފައި ވަނީ މޯލްޑިވިއަންގެ ބޭރު ދަތުރުތައް ފުޅާކޮށް، ދުރު މަންޒިލްތަކަށް ދަތުރުތައް ފެށުމަށް ކަމަށް އެ ކުންފުނިން ބުނެއެވެ.
