ހއ.ހޯރަފުށީ އެއާޕޯޓްގައި ރޭގަނޑު ފްލައިޓް ޖެއްސޭނެ އިންތިޒާމު ހަމަޖެއްސުމުގެ ގޮތުން ލައިޓް ހަރުކުރުމުގެ މަސައްކަތް ފެށުމަށް ތައްޔާރުވެފައިވާ ކަމަށް ރީޖަނަލް އެއާޕޯޓްސް އިން ބުނެފިއެވެ.
ރީޖަނަލް އެއާޕޯޓްސް އިން ބުނީ، ހޯރަފުއްޓަށް ރޭގަނޑު ފްލައިޓް ޖެއްސުމުގެ ގޮތުން ލައިޓް ހަރުކުރަން ބޭނުންވާ ސާމާނު މިހާރު އެ ރަށަށް ގެންދެވިފައިވާ ކަމަށާއި، ކުރިޔަށް އޮތް މަހެއްހާ ދުވަސް ތެރޭގައި ލައިޓް ހަރުކުރުމުގެ މަސައްކަތް ނިންމާލެވޭނެ ކަމަށެވެ.
ރީޖަނަލް އެއާޕޯޓްސް އިން އަންނަނީ އެއާޕޯޓްތައް ރޭގަނޑުވެސް އޮޕަރޭޓް ކުރެވޭ ގޮތަށް ލައިޓް ހަރުކުރުމުގެ މަސައްކަތްތައް ކުރަމުންނެވެ. މިގޮތުން އެ ކުންފުނިން ވަނީ ކުޅުދުއްފުށީ އެއާޕޯޓްގައި ލައިޓް ހަރުކޮށް ނިންމާފައެވެ.
