މަސްވެރިކަމުގެ ދާއިރާ ތަރައްގީކުރުމުގެ ގޮތުން މިފްކޯގެ އުޅަނދުތަކުގައި މަސް ރައްކާ ކުރެވޭ ކެޕޭސިޓީ 1،727 މެޓްރިކް ޓަނުން 5،027 މެޓްރިކް ޓަނަށް އިތުރުކުރެވިފައިވާ ކަމަށް ރައީސް އިބްރާހިމް މުހައްމަދު ސޯލިހު ވިދާޅުވެއްޖެއެވެ.
ފ.ފިއަލީ އިންޖީނުގެއާއި އައިސްޕްލާންޓް ހުޅުވުމަށް ބޭއްވި ރަސްމިއްޔާތުގައި ރައީސް ސޯލިހު ވިދާޅުވީ، މީގެ ކުރިން މަސްވެރިކަމުގެ ދާއިރާ ތަރައްގީ ކުރުމަށް މާ ބޮޑު ކަންކަމެއް ކުރެވިފައި ނުވާ ކަމަށާއި، ނަމަވެސް މި ސަރުކާރުން ހަވާލުވެ މަސްވެރިކަމުގެ ދާއިރާ ކުރިއެރުވުމަށް ގިނަ މަޝްރޫއުތަކެއް ހިންގަމުން އަންނަ ކަމަށެވެ.
މަސް ގަނޑުކޮށް ފިނިކުރުމުގެ ކެޕޭސިޓީ ސަރުކާރު ހަވާލުވިއިރު ހުރީ 80 މެޓްރިކް ޓަނުގައިކަން ފާހަގަކުރައްވާ ރައީސް ސޯލިހު ވިދާޅުވީ، މިފްކޯގެ އައު ބޯޓު ޖަޒީރާ 103 ރާއްޖެ ގެނެވުމާއެކު މަސް ގަނޑުކޮށް ފިނިކުރުމުގެ ކެޕޭސިޓ 600 މެޓްރިކް ޓަނަށް އިތުރުވެގެން ގޮސްފައިވާ ކަމަށެވެ. އަދި އަލަށް ގެންނަ ތިން ބޯޓާއެކު ކެޕޭސިޓީ ބޮޑުތަނުން އިތުރުވާނެ ކަމަށްވެސް ރައީސް ވިދާޅުވިއެވެ.
މީގެކުރިން ދައުލަތުގެ ބަޖެޓުން ހޭދަކޮށްގެން މަސްވެރިން އަތުން މަސް ނުގަންނަ މިންވަރަށް ސަރުކާރުން މަސް ގަނެފައިވާކަން ފާހަގަކުރައްވާ ރައީސް ސޯލިހު ވިދާޅުވީ، މިހާތަނަށް މަސްވެރިން އަތުން 3.58 ބިލިއަން ރުފިޔާގެ މަސް ގަނެފައިވާ ކަމަށެވެ.
ރައީސް ސޯލިހު ވިދާޅުވީ، މަސްވެރިކަމުގެ ދާއިރާއަށް ސަރުކާރުން މިގެންނަމުން އަންނަ ތަރައްގީގެ ނަތީޖާ ތަފާތުބޮޑުކޮށް މި އަހަރު ފަހުކޮޅު ފެންނާނެ ކަމަށައި، އަދި މަހުގެ އަގަށް ލަސްތަކެއް ނުވެ ހެޔޮ ބަދަލެއް ގެނެވޭނެ ކަމަށެވެ.
