ކ.ގުރައިދޫގައި ރޯހައުސް އަޅައިދީ، ބަނދަރު އަޕްގްރޑްކޮށް، ޒުވާނުންގެ މަރުކަޒެއް ވަސީލަތްތަކާއެކު ގާއިމުކޮށްދިނުމަށް އެމްޑީޕީގެ ރިޔާސީ ކެންޑިޑޭޓް ރައީސް އިބްރާހިމް މުހައްމަދު ސޯލިހު ވައުދުވެވަޑައިގެންފިއެވެ.
ރިޔާސީ އިންތިހާބުގެ ކެމްޕޭނަށް ކ.ގުރައިދޫއަށް ވަޑައިގެން ރަށުގެ ރައްޔިތުންނާ ބައްދަލުކުރައްވައި ރައީސް އިބްރާހިމް މުހައްމަދު ސޯލިހު ވިދާޅުވީ، ގުރައިދޫ ރައްޔިތުން ރަށުން ގޯތި ބޭނުންވާ ކަމަށާއި، އެކަން ކައުންސިލަށް ނުކުރެވޭނަމަ ގާނޫނަށް ގެންނަން ޖެހޭ ބަދަލެއް ގެނެސްގެން ނަމަވެސް ރަށުގެ ރައްޔިތުންނަށް ބޯހިޔާވެހިކަން ފޯރުކޮށްދޭނެ ކަމަށެވެ.
ކުރިޔަށް އޮތް ފަސް އަހަރަށް އެކުލަވާލާ މެނިފެސްޓޯގައި ގުރައިދޫގެ ރައްޔިތުންނަށް ބޯހިޔާވެހިކަން ހަމަޖައްސައިދިނުމަށް ފްލެޓް ނުވަތަ ރޯހައުސް އެޅުމަށާއި، ޒުވާނުންގެ މަރުކަޒު ވަސީލަތްތަކާއެކު ފުރިހަމަ ކޮށްދިނުމާއި، ބަނދަރު އަޕްގްރޭޑް ކުރުމުގެ ގޮތުން ނެރެއް ކަނޑައި، ބޭރުތޮށި މިހާރަށްވުރެ ރަނގަޅަށް ބޭނުންކުރެވޭ ގޮތް ހަދައިދޭނެ ކަމަށެވެ.
މީގެއިތުރުން ރައީސް ސޯލިހު ވިދާޅުވީ، ރައްޔިތުން ބޭނުންވާ ކަންކަމަށް ހުރަސް އަޅާ ބަޔަކަށް ޖާގައެއް ނުދޭނެ ކަމަށާއި، ކުރިޔަށް އޮތް އިންތިހާބުތަކުގައި ރައްޔިތުން އެކަންކަމާމެދު ވިސްނާނެ ކަމަށެވެ. އަދި ރައްޔިތުން ބޭނުންވާ ކަންކަން ނުކޮށްދެވޭ މީހަކު އިންތިހާބަކުން ނުހޮވާނެ ކަމަށެވެ.
