އަންނަ ދައުރަށް އެންމެ މުހިންމު އަމާޒަކީ ޒުވާނުންގެ ބައިވެރިވުން އިތުރުކުރުން ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވިދާޅުވެއްޖެއެވެ.
މިރޭ ކ.މާފުށީގައި ބޭއްވި ކެމްޕޭން ޖަލްސާގައި ވާހަކަ ދައްކަވަމުން ރައީސް ވިދާޅުވީ، ކުރިއަށް އޮތް ދައުރަށް ކުރިމަތިލަނީ ގިނަ ވައުދުތަކަކާއެކު ކަމަށެވެ. އަންނަ ދައުރަށް އުންމީދުތަކަކާއި އަމާޒެއް އެބަ އޮތް ކަމަށާއި، އެގޮތުން އެންމެ މުހިންމު އަމާޒަކީ ޒުވާނުންގެ ބައިވެރިވުން އިތުރު ކުރުން ކަމަށެވެ.
މާފުށީގެ ރައްޔިތުންނާއި ވާހަކަދައްކަވަމުން ރައީސް ވިދާޅުވީ، އާ ޒުވާނުންގެ ޖީލަށް ފުރުސަތުތައް ހުޅުވެން ޖެހޭ ކަމަށާއި، އެކަން ޔަގީންކުރައްވާނެކަމަށެވެ. ހުރިހާވެސް ބޭނުމަކީ، ރާއްޖޭގެ ކަންކަމުގައި ބަސްބުނެ ހަރަކާތްތެރިވުމުގެ ޖާގަ ޒުވާނުންނަށް ހުޅުވާލުން ކަމަށްވެސް ރައީސް ވިދާޅުވިއެވެ.
ދިވެހިންނަކީ ވިސްނުންތެރި، ހޭލުންތެރި އަދި މަސައްކަތްތެރި ބަޔަކަށްވާއިރު އެ މަސައްކަތް ކުރުމަށް ޖާގަ ހުޅުވެންޖެހޭކަމަށްވެސް ރައީސް ވިދާޅުވިއެވެ. ސަރުކާރުގެ އަމާޒަކީ އެ ފުރުސަތު ފަހި ކޮށްދިނުން ކަމަށެވެ. އަދި، އުންމީދަކީ ރާއްޖޭގެ އިގްތިސާދު ކުރިއަރުވައި، ދެގުނަ ކުރުންކަމަށެވެ.
ރައީސް ވިދާޅުވީ، މިއަދު ފެނުނު މަންޒަރުންވެސް އެމްޑީޕީއާއެކު ކުރިއަށްދާން މާފުށި ތައްޔާރަށް އޮތްކަން ހާމަވާކަމަށެވެ. ރިޔާސީ އިންތިހާބަށް ކެމްޕޭން ކުރުމުގެ ގޮތުން މިއަދު ރައީސް ވަނީ ކ.ގުޅި، ކ.ގުރައިދޫއަށްވެސް ވަޑައިގެން ރައްޔިތުންނާއި ބައްދަލުކުރައްވާފައެވެ.
