ކުރިޔަށް އޮތް ދައުރުގައި މ.ނާލާފުށީގައި ޒަމާނީ ބޮޑު ބަނދަރެއް ހަދައި، ރޯހައުސް އަޅައިދިނުމުގެ އިތުރުން މީމު އެއާޕޯޓް ނިމުމާއެކު ނާލާފުއްޓާއި މުލި ގުޅުވައިދޭނެ ކަމަށް ރައީސް އިބްރާހިމް މުހައްމަދު ސޯލިހު ވައުދުވެވަޑައިގެންފިއެވެ.
ރިޔާސީ އިންތިހާބުގެ ކެމްޕޭނަށް މުލަކު އަތޮޅަށް ކުރައްވާ ދަތުރުފުޅުގައި ރައީސް ސޯލިހު ނާލާފުއްޓަށް ވަޑައިގެން އެ ރަށު ރައްޔިތުންނާ ބައްދަލުކުރައްވައި ވާހަކަދައްކަވަމުން ވިދާޅުވީ، ކުރިޔަށް އޮތް ދައުރުގެ ތެރޭގައި ރައްޔިތުން އެދޭ ގޮތަށް ރަށުގައި ބޮޑު އައު ބަނދަރެއް ހަދައިދޭނެ ކަމަށާއި، އަދި ރަށުގެ ރައްޔިތުންނަށް ބޯހިޔާވެހިކަން ހޯދައިދިނުމަށް ރަށަށް ބިން އިތުރުކޮށްގެން ނަމަވެސް ފްލެޓް ނުވަތަ ރޯ ހައުސް އަޅައިދޭނެ ކަމަށެވެ.
ނާލާފުއްޓާއި މުލި ގުޅުވައިދިނުމުގެ މަސައްކަތް މި އަހަރު ތެރޭގައި މީމު އެއާޕޯޓް ނިމުމާއެކު ފެށޭނެކަން ފާހަގަކުރައްވާ ރައީސް ސޯލިހު ވިދާޅުވީ، ނާލާފުށީގެ ފެނާއި ނަރުދަމާގެ ނިޒާމު ގާއިމުކުރުމުގެ މަސައްކަތުގައި ލަސްތަކެއް އުޅޭ ނަމަވެސް މި އަހަރު އެ މަސައްކަތް އެއްކޮށް ނިންމާލެވޭނެ ކަމަށެވެ.
