ރިޔާސީ އިންތިހާބަށް ކެމްޕޭން ކުރުމުގެ ގޮތުން މުލަކު އަތޮޅަށް ކުރައްވަމުން ގެންދަވާ ދަތުރުގެ ތެރެއިން، އެ އަތޮޅު ވޭވަށަށް ވަޑައިގެން އެ ރަށަށް މި ދައުރުގައި ކޮށްދެވިފައިވާ ކަންކަމާއި އަދި އަންނަ ދައުރުގައި ކޮށްދިނުމަށް ހަމަޖެހިފައިވާ ގިނަ ކަންތައްތަކެއް ރައީސް އިބްރާހިމް މުހައްމަދު ސޯލިހު ހިއްސާކުރައްވައިފިއެވެ.
އާބާދީ މަދު ވޭވަށުން 2018 ވަނަ އަހަރު އެންމެ ބޮޑަށް އެދުނީ ބަނދަރު ބޮޑު ކުރުމަށެވެ. އެ ހަނދާން އައު ކުރައްވަމުން ރައީސް ވިދާޅުވީ، އެ ފަހަރު ވޭވަށް ވީ ހަމައެކަނި ވައުދަކީ އެއީ ކަމަށާއި އެ ވައުދާއި އެއްގޮތަށް އެކަން ނިންމާފައިވާ ކަމަށެވެ. އޭގެ އިތުރުންވެސް، ވައުދު ނުވި ނަމަވެސް ގިނަ ކަންތައްތަކެއް ކޮށްދެވިފައިވާ ކަމަށެވެ. އެގޮތުން، ފެނާއި ނަރުދަމާގެ ނިޒާމާއި، އައު އިންޖީނުގެއަކާއި، ސްކޫލުގެ އައު އިމާރާތަކާއި، ކައުންސިލް އަދި މެޖިސްޓްރޭޓް ކޯޓުގެ އައު އިމާރާތުގެ މަސައްކަތްވެސް މި ސަރުކާރުން ކުރަމުން އަންނަ ކަމަށެވެ.
އޭގެތެރެއިން ގިނަ މަސައްކަތްތައް ނިމިފައިވާއިރު، އައުޓްޑޯ ޖިމެއްވެސް ވޭވަށުގައި ގާއިމްކޮށްދެވިފައިވާ ކަމަށެވެ. އަދި، ޒުވާނުންގެ އެދުމުގެ މަތިން އެ ރަށުގައި ޒަމާނީ ފެންވަރުގެ ފުޓްބޯޅަ ދަނޑެއް އެޅުމުގެ މަސައްކަތްވެސް ކުރަމުން އަންނަކަން ރައީސް ފާހަގަކުރެއްވިއެވެ.
މިފަހަރުގެ ކެމްޕޭންގެ ތެރެއިން ރައްޔިތުން އެދުނު ކަންކަމަށް އަލިއަޅުއްވާލައްވަމުން ރައީސް ވިދާޅުވީ، ރަށް ގިރާ ސަރަހައްދަށް ހައްލެއް ރައްޔިތުން ބޭނުންވާކަމަށެވެ. އެކަން މެނިފެސްޓޯގައި ހިމަނައްވާނެ ކަމަށާއި، އަދި ބަނދަރުގެ ތިލަ ބައެއް ސަރަހައްދުތަކަށް ރައްޔިތުން ބޭނުންވާގޮތަށް ބަދަލުތައް ގެންނަވާނެ ކަމަށްވެސް ރައީސް ވައުދުވެވަޑައިގެންނެވިއެވެ.
މ އަތޮޅަކީ ކުރިން އެމްޑީޕީއާ ދުރު އަތޮޅެއް ނަމަވެސް، އެ އަތޮޅު މިހާރު އަންނަނީ ބަދަލުވަމުންނެވެ. އެންމެ ފަހުން ބޭއްވި ކައުންސިލް އިންތިހާބުންވެސް ވޭވަށު މުޅި ކައުންސިލަށް އިންތިހާބުވީ އެމްޑީޕީގެ ކެނޑިޑޭޓުންނެވެ. އެކަން ފާހަގަކުރައްވަމުން ރައީސް ވިދާޅުވީ، ވޭވަށު ރައްޔިތުން ބޭނުންވަނީ ތަރައްގީއާއެކު ކުރިއަށް ދާން ކަމަށާއި، ރިޔާސީ އިންތިހާބުގައިވެސް ބޮޑުތަނުން އެމްޑީޕީ އެ ރަށް ނަގާނެކަމަށް ޝައްކު ނުކުރައްވާ ކަމަށެވެ.
