ތަފާސް ހިސާބުތަކުން ދައްކާގޮތުން ރާއްޖޭގެ އާބާދީ ދަތުރުކުރަމުން މިދަނީ ދުވަސްވީ މީހުން ގިނަ އާބާދީއަކަށް ކަމަށާއި "އެލްޑާލީ ކެއާ"ގެ މައުލޫމާތު ރާއްޖޭގެ ކޮންމެ ގޭބީސީއެއްގެ ވެސް އެކަކަށް އެނގެންޖެހޭ ކަމަށް މިނިސްޓަރ އޮފް ހަޔަރ އެޑިޔުކޭޝަން ޑރ. އިބްރާހިމް ހަސަން ވިދާޅުވެއްޖެ އެވެ.
މިނިސްޓަރ އޮފް ޖެންޑަރ، ފެމިލީ އެންޑް ސޯޝަލް ސަރވިސަސް އާއި މޯލްޑިވްސް ޕޮލިޓެކްނިކް ގުޅިގެން ބޭއްވި ސެޓްފިކެޓް 3 އިން އެލްޑަރލީ ކެއަރ އިފްތިތާހު ކުރުމުގެ ޖަލްސާގައި ވާހަކަ ދައްކަވަމުން މިނިސްޓަރު ވިދާޅުވީ އެލްޑާލީ ކެއާ ޕްރޮގްރާމް މުޅިރާއްޖެއަށް ފުޅާކުރަންޖެހޭ ކަމަށް ދެކެވަޑައިގަންނަވާ ކަމަށެވެ.
ގުރައިދޫގައި ހުންނަ ހާއްސަ އެހީއަށް ބޭނުންވާ މީހުންގެ މަރުކަޒުގައި މަސައްކަތް ކުރާ މުއައްޒަފުންނަކީ އާދަޔާ ޚިލާފަށް ކުލުނުހުރި އިސްރަށްވެހިންނާއި ދޭތެރޭ އޯގާތެރިވާ މުއައްޒަފުން ކަމަށާއި، ނަމަވެސް ކަމާ ގުޅޭ ތައުލީމާއި ހުނަރު ހުރެގެން މަސައްކަތް ކުރުމަކީ ނަތީޖާ އެންމެ ރަނގަޅުވާނެ ކަމެއް ކަމަށް ކަމުގެ މާހިރުން ވިދާޅުވާކަމަށް މިނިސްޓަރ ވިދާޅުވިއެވެ.
ޖެންޑަރ މިނިސްޓްރީން އިސްނަގައިގެން ފެށި މި ޕްރޮގްރާމް މޯލްޑިވްސް ޕޮލިޓެކްނިކް އިން ފަރުމާކޮށްދިން ކަމަށްޓަކައި އެކަމަށްޓަކައި މޯލްޑިވްސް ޕޮލިޓެކްނިކްގެ މުވައްޒަފުންނަށާއި ޖެންޑަރ މިނިސްޓްރީގެ މުވައްޒަފުންނަށް ޝުކުރު އަދާކުރައްވާފަ އެވެ. އަދި މިނިސްޓަރ ވިދާޅުވީ އެ މަސައްކަތްތަކުގެ ސަބަބުން ގުރައިދޫގައި ސަރުކާރުގެ ބެލުމުގެ ދަށުގައި ތިބި ފަރާތްތްކުގެ ދިރިއުޅުމުގެ ފެންވަރު އެތަށް ގޮތަކުން ރަނގަޅުވެގެންދާނެ ކަމަށް ގަބޫލު ކުރައްވާކަމަށެވެ.
"މި ޕްރޮގްރާމް ފަރުމާ ކޮށްދެއްވުމުގައި ވަރަށް ބުރަކޮށް އުޅުއްވި މޯލްޑިވްސް ޕޮލިޓެކްނިކްގެ ހުރިހާ ހީވާގި މުވައްޒަފުންނަށާއި ޖެންޑަރ މިނިސްޓްރީގެ ހުރިހާ ބޭފުޅުންނަށް އިހްލާސްތެރިކަމާއެކު ޝުކުރު އަދާކުރަން. ތިބޭފުޅުން ތި ކޮށްދެއްވި މަސައްކަތުގެ ސަބަބުން މިއަދުގެ ރަސްމިއްޔާތު ބޭއްވިގެން މިދިޔައީ" މިނިސްޓަރު ވިދާޅުވި އެވެ.
ސެޓްފިކެޓް 3 އިން އެލްޑާލީ ކެއާގެ ޕްރޮގްރާމަށް އިޝާރަތް ކުރައްވާ މިނިސްޓަރު ވިދާޅުވީ މިޕްރޮގްރާމުގައި ދުވަސްވީ މީހުންނަށް އަޅާލާ އެމީހުންނަށް ކެއަރ ކުރުމުގައި އޮންނަ ގާނޫނީ ޒިންމާއާއި މަސްއޫލިއްޔަތު ހިމަނާފައިވާ ކަމަށާއި "އެތިކަލް ރެސްޕޯންސިބިލިޓީ"ގެ ބައިވެސް ވަރަށް ބޮޑަށް ހިމެނިފައިވާ ކަމަށެވެ. އަދި ދުވަސްވީ މީހުންނަށް އަޅާލުމުގައި މުއާމަލާތް ކުރަންވީ ގޮތް ވެސް މި ޕްރޮގްރާމުގެ ތެރޭގައި ހިމެނިފައިވާ ކަމަށް މިނިސްޓަރ ވިދާޅުވި އެވެ.
ސެޓްފިކެޓް 3 އިން އެލްޑާލީ ކެއާގައި 24 ފަރާތްތައް ވަނީ ބައިވެރިވެފައިވާއިރު، މިއީ 15 ހަފްތާގެ މުއްދަތަށް ކުރިއަށް ގެންދާ ޕްރޮގްރާމެކެވެ.
