އަންނަ ދައުރުގައި ރ. މީދޫގައި ބިން ބޮޑުކޮށް، ހައުސިން މަޝްރޫއުއެއް ހިންގައި، މަގު ހަދައި، ބޮޑު މިސްކިތަކާއި، ވޮލީ ކޯޓަކާއި ކޮމިއުނިޓީ ސެންޓަރެއްގެ އިތުރުން ކަރަންޓުގެ މައްސަލަ ހައްލުކޮށްދެއްވާނެ ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ޞޯލިހު ވައުދުވެވަޑައިގެންފިއެވެ.
ރައީސް މިގޮތަށް ވައުދުވެވަޑައިގެންނެވީ ރިޔާސީ އިންތިހާބަށް ކެމްޕޭން ކުރުމުގެ ގޮތުން ނ. އަތޮޅަށް ކުރައްވަމުން ގެންދަވާ ދަތުރުގެ ތެރެއިން އެ އަތޮޅު މާފަރަށް ވަޑައިގެން މިއަދު ބޭއްވި ޖަލްސާގައި ވާހަކަފުޅުދައްކަވަމުންނެވެ. އެގޮތުން، އެ ޖަލްސާގައި ރައީސް ވިދާޅުވީ، މި ސަރުކާރުގެ އަމާޒަކީ މީހެއްގެ ފިކުރަކަށް، އެމީހަކު ދިރިއުޅޭ ރަށަކަށް ބެލުމެއްނެތި އަސާސީ ހިދުމަތްތައް ފޯރުކޮށްދިނުން ކަމަށެވެ.
އެ ސިޔާސަތު ތަންފީޒުކުރެވުމުގެ ނަތީޖާއަކީ، މިހާރު ރައްޔިތުން ސަރުކާރު ބަލައިގަނެފައިވުން ކަމަށާއި، އެކަން މީދޫއިންވެސް ސާފުވާ ކަމަށެވެ. "މީދޫ އަކީ ކުރިން ވަކި ޕާޓީއެއްގެ ޖަގަހައެއްގެ ގޮތުގައި އޮތް ރަށެއް" ނަމަވެސް، މިހާރު އެކަން ބަދަލުވެފައިވާ ކަމަށާއި، މީދޫ ރައްޔިތުންވެސް ބޭނުންވަނީ އަންނަމުންދާ ތަރައްގީއާއެކު ކުރިއަށް ދިޔުން ކަމަށް ރައީސް ވަނީ މިއަދު ވިދާޅުވެފައެވެ.
ކުރިއަށް އޮތް ދައުރަށް އެމްޑީޕީއިން ނެރޭ އުފާވެރި އަމާން ރާއްޖެ މެނިފެސްޓޯއަށްވެސް މިއަދުގެ ޖަލްސާގައި ރައީސް ވަނީ އަލިއަޅުއްވާލައްވާފައެވެ. އެގޮތުން، އިންސާފު ގާއިމް ކުރުމަކީ އަބަދުވެސް އެމްޑީޕީއިން އެންމެ ބޮޑު އިސްކަމެއްދޭ ކަންތައްކަން ފާހަގަކުރައްވަމުން ރައީސް ވިދާޅުވީ، މިހާރު ސުޕްރީމް ކޯޓަށް އިތުބާރު ގާއިމްކުރެވި، ފަނޑިޔާރުގެތަކަށް އަންހެނުން އިސްކުރެވުމަކީ ގެނެވުނު އިންގިލާބީ ބޮޑު ބަދަލެއް ކަމަށެވެ. ކުރިއަށް އޮތް ތަނުގައިވެސް މަސައްކަތް ކުރައްވާނީ އަދުލުގެ ނިޒާމަށް ރައްޔިތުންގެ އިތުބާރު އިތުރުކުރުމަށް ކަމަށެވެ. އަންނަ ދައުރުގައި މަސައްކަތް ކުރައްވާނީ ވަސީލަތްތައް އިތުރުކޮށް، ޕްރޮފެޝަނަލް ފަނޑިޔާރުން ގާއިމްކޮށް، އިންސާފަށް ކުރަންޖެހޭ ދަތުރު ކުރު ކުރުމަށްކަމަށެވެ.
އަންނަ ދައުރުގައި މީދޫގެ ތަރައްގީއަށް ކޮށްދިނުމަށް ހަމަޖެހިފައިވާ ކަންކަން ފާހަގަކުރައްވަމުން ރައީސް ވިދާޅުވީ، މިހާރު މީދޫގެ ބިން ފުރިފައި އޮތުމުން، ބިން އިތުރުކޮށް ބޯހިޔާވަހިކަމަށް ހައްލެއް ބޭނުންވާ ކަމަށެވެ. އަންނަ ދައުރުގައި ބިން ހިއްކައި، ހައުސިންގ މަޝްރޫއުއެއް ފައްޓައިދީ، ރަށުގެ ނުހެދި ހުރި މަގުތައް ޒަމާނީ ފެންވަރަށް ހަދައި ތާރު އަޅައިދޭނެ ކަމަށެވެ. އަދި، އައު ބޮޑު މިސްކިތެއް އަޅައި، ކަރަންޓުގެ ކެޕޭސިޓީ އިތުރުކުރުމަށް އައު އިންޖީނުގެއަކާއެކު ނެޓްވޯކް ބަދަލުކޮށްދީ، ޒުވާނުންނަށް ވޮލީ ކޯޓަކާއި، ފުޓްވޯޅަ ދަނޑުގެ ރެސްޓްރޫމްއާއި، ކޮމިއުނިޓީ ސެންޓަރެއްވެސް އަޅައިދެއްވާނެ ކަމަށެވެ.
އަދިވެސް، މީދޫ ރައްޔިތުން ބޭނުންވާ ކަންކަން ހުރެދާނެ ކަމަށާއި، ސަރުކާރާއި މަޝްވަރާ ކޮށްގެން އެކަންކަން ވެސް ކޮށްދިނުމަށް ސަރުކާރު އަބަދުވެސް އޮންނާނީ ތައްޔާރަށް ކަމަށެވެ. ރިޔާސީ އިންތިހާބަށް ކެމްޕޭން ކުރުމަށް މިހާރު ގިނަ ރަށްރަށަށް ދަތުރުކުރެވިފައިވާއިރު، ރައީސް ވިދާޅުވީ އިންތިހާބު އެއްބުރުން ކާމިޔާބު ކުރެވޭނެ ކަމުގެ ޔަގީންކަން މިހާރު ލިބިފައިވާކަމަށެވެ.
