އިދިކޮޅު ޕީޕީއެމް ޕީއެންސީއިން ވާދަކުރައްވާ ޑރ. މުހައްމަދު މުއިއްޒުގެ ރަނިންގ މޭޓުގެ ގޮތުގައި ފަރެސްމާތޮޑާ ދާއިރާގެ މެންބަރު ހުސެއިން މުހައްމަދު ލަތީފް (ސެމްބެ) އިހުތިޔާރު ކުރީ މަޖުބޫރުވެގެން ކަމަށާއި، އިދިކޮޅުގެ ކެމްޕޭނަށް ފަންޑުކުރަނީ ގޭންގު ތަކުން ކަމަށް ހޯމް މިނިސްޓަރު އަދި އަދާލަތު ޕާޓީގެ ރައީސް ޝޭހް އިމްރާން އަބްދުﷲ ތުހުމަތުކުރައްވައިފިއެވެ.
ޝޭހް އިމްރާން މިހެން ވިދާޅުވެފައިވަނީ މިރޭ އައްޑޫ ސިޓީގައި ބޭއްވި ބޮޑު ޖަލްސާގައި ވާހަކަދައްކަވަމުންނެވެ. އެ ޖަލްސާގައި އިމްރާން ވަނީ އިދިކޮޅަށް ބަހުގެ ގިނަ ހަމަލާތަކެއް ފޮނުވާލާފައެވެ. އެގޮތުން، ޕީޕީއެމް ވެރިކަމުގައި އޮތް ކަޅު އަދިރި ޒަމާނަށް ރައްޔިތުން ދެން އެނބުރި ދާން ބޭނުންނުވާ ކަމަށް އިމްރާން ވަނީ ވިދާޅުވެފައެވެ. ރިޔާސީ އިންތިހާބު ކެމްޕޭނު ތެރޭގައި ރައީސް ގާތްގަނޑަކަށް ހުރިހާ ރަށަކަށް ޒިޔާރަތްކުރެއްވިއިރު، ޑރ. މުއިއްޒުއަށް ދެބައިކުޅަ އެއްބައި ރަށަށްވެސް ނުދާކަން އިމްރާން ވަނީ ފާހަގަކޮށްފައެވެ.
މީގެއިތުރުން، މުއިއްޒުގެ ރަނިންގ މޭޓުގެ ގޮތުގައި ސެމްބެ އިހުތިޔާރު ކުރީ މަޖުބޫރުވެގެން ކަމަށްވެސް އިމްރާން ވަނީ ތުހުމަތުކުރައްވާފައެވެ. "މުއިއްޒު ރަނިންގ މޭޓު އިހުތިޔާރު ކުރުމުގައި ވެއްޓި ވަޑައިގެންނެވި މަޖުބޫރީ ހާލަތު ސިޔާސީ މައިދާނުގައި މަސައްކަތް ކުރައްވާ ބޭފުޅުންނާއި ސަލާމަތީ ހިދުމަތްތަކުގެ އިސް ސަފުގައި މަސައްކަތް ކުރައްވާ ބޭފުޅުންނަށް އެނގިވަޑައިގަންނަވާނެ" އިމްރާން ވިދާޅުވިއެވެ.
އިދިކޮޅުގެ ކެމްޕޭނަށް ފަންޑު ކުރަނީވެސް ސީދާ ގޭންގު ތަކުން ނިކުމެ ކަމަށާއި އެ ބޭފުޅުން އިންތިހާބު ކާމިޔާބު ކުރައްވައިފިނަމަ ގޭންގު ތަކުގެ ބާރު ސަރުކާރުގެ ހުރިހާ ދިމާލެއްގައިވެސް ހިނގާނެކަމަށް އިމްރާން ވަނީ ވިދާޅުވެފައެވެ. އެގޮތުން، ނައިބުރައީސް އުޅުއްވާ ހިލާލީގެ ވާނީ ގޭންގްތައް އޮޕަރޭޓް ކުރާ ކޮމާންޑް ސެންޓަރަކަށް ކަމަށާއި، ކޮމިޝަނަރ އޮފް ޕޮލިސްއާއި ޕްރޮސެކިއުޓަރ ޖެނެރަލްއަށްވެސް އައްޔަންކުރާނީ ގޭންގް ލީޑަރުން ކަމަށް އިމްރާން ވަނީ ތުހުމަތުކުރައްވާފައެވެ.
"ސަލާމަތީ ހިދުމަތްތަކުގެ ބޭފުޅުންނަށް މިކަން އެނގޭ. އަޅުގަނޑަށް އިނގޭ މި ދައްކަނީ ކިހާ ނުރައްކާތެރި ވާހަކައެއް ކަން. އަޅުގަނޑަށް އިނގޭ އަޅުގަނޑާއި އާއިލާ މިލީ ނުރައްކަލުގެ ތެރެއަށްކަން" އިމްރާން ވިދާޅުވިއެވެ. އެހެންނަމަވެސް، އެއީ ހަދައިގެން ދައްކާ ވާހަކައެއް ނޫންކަމަށާއި، ގައުމާއި ރައްޔިތުންގެ މަސްލަހަތުގައި އެ ވާހަކަ ދައްކަން މަޖުބޫރުވެފައިވާކަމަށްވެސް އިމްރާން ވިދާޅުވިއެވެ.
ޝޭހް އިމްރާންގެ އިތުރުން، ކެމްޕޭން ސްޕޯކްސްޕާރސަން އަދި ޑިފެންސް މިނިސްޓަރ މާރިޔާވެސް ވަނީ މީގެ ކުރިން ޑރ. މުއިއްޒުގެ ކެމްޕޭނަށް މިފަދަ ތުހުމަތުތަކެއް ކުރައްވާފައެވެ. އެގޮތުން، އެއީ ހަރުކަށި ފިކުރުގެ ބަޔަކު އަތްގަދަ ކުރުމަށް ހިންގާ ކެމްޕޭނެއްގެ ގޮތުގައި މާރިޔާ ވަނީ ކުރިން ސިފަކުރައްވާފައެވެ.
