ރިޔާސީ އިންތިހާބުގެ ދެވަނަ ބުރުގައި ޖުމްހޫރީ ޕާޓީ އާއި ޑިމޮކްރެޓްސްގެ މެޖޯރިޓީ އޮތީ އެމްޑީޕީ އާއި ގުޅިފައިވާ ޕާޓީތަކާއެކު ކަމަށް އެމްޑީޕީގެ ރިޔާސީ ކެންޑިޑޭޓް ރައީސް އިބްރާހިމް މުހައްމަދު ސޯލިހު ވިދާޅުވެއްޖެއެވެ.
މާފަންނު ހުޅަނގުގައި ކުރިޔަށް ގެންދިޔަ ދޮރުން ދޮރަށް ހަރަކާތުގެ ތެރެއިން ނޫސްވެރިންނަށް މައުލޫމާތު ދެއްވަމުން ރައީސް ސޯލިހު ވިދާޅުވީ، ޖެޕީ އާއި ޑިމޮކްރެޓްސްގެ ބޮޑު ބައެއްގެ ތާއީދު އޮތީ އެމަނިކުފާނަށް ކަމަށާއި، އެގޮތުން ބައެއް މެމްބަރުން އަމަލީ ގޮތުންވެސް ކެމްޕޭނުގައި ބައިވެރިވާން ފަށާފައިވާ ކަމަށެވެ.
ޖޭޕީގެ ކައުންސިލް މެމްބަރުންނާ ބައްދަލުކުރެއްވިކަން ފާހަގަކުރައްވާ ރައީސް ސޯލިހު ވިދާޅުވީ، ކައުންސިލްގެ ގިނަ މެމްބަރުންގެ ތާއީދުވެސް އޮތީ އެމަނިކުފާނަށް ކަމަށާއި، ކުރިޔަށް އޮތް ތަނުގައި މެމްބަރުން އެންޑޯޒް ކުރަމުން ދާނެ ކަމަށެވެ.
މީގެއިތުރުން ޑިމޮކްރެޓްސްގެ ބައެއް މެމްބަރުން ކެމްޕޭނުގައި އަމަލީ ގޮތުންވެސް ބައިވެރިވާން ފަށާފައިވާ ކަމަށާއި، އެންމެންގެ ތާއީދު އަންނަނީ ލިބެމުން ކަމަށެވެ. އަދި ފުރަތަމަ ބުރުގައި އެހެން ބޭފުޅުންނަށް ވޯޓުދެއްވި ބޭފުޅުންނަށް އެމަނިކުފާނަށް ވޯޓު ދެއްވުމަށްވެސް ރައީސް ވަނީ އެދިވަޑައިގެންފައެވެ.
