ކޯޓު އަމުރެއްގެ ދަށުން ފުލުހުން ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އަށް ވަދެއްޖެއެވެ.
ފުލުހުން ބުނީ، އެ އިދާރާއިން ހިންގަމުންދާ އެފްއޭއެމްގެ މާލީ މުއާމަލާތްތަކާ ގުޅޭ ޖިނާއީ ތަހުގީގަކަށް ބޭނުންވާ ހެކި ހޯދުމަށް ކޯޓު އަމުރެއްގެ ދަށުން ފުލުހުންގެ ޓީމެއް އެފްއޭއެމްގައި ދަނީ ހަރަކާތްތެރިވަމުން ކަމަށެވެ. އަދި މިކަމާ ގުޅޭ އިތުރު ތަފްސީލެއް ފުލުހުންނެއް ނުދެއެވެ.
މާފަންނު ސްޓޭޑިއަމް ސަރަހައްދުގައި ހުންނަ އެފްއޭއެމް ހައުސްގައި ފުލުހުން ހަރަކާތްތެރިވަމުން އަންނައިރު، އެ ސަރަހައްދު ވަނީ އާންމުންނަށްވެސް ނުވަދެވޭ ގޮތަށް ބަންދުކޮށްފައެވެ.
އެފްއޭއެމްއާ ގުޅޭ މަނީ ލޯންޑަރިން އާއި ހިޔާނާތަށް ތުހުމަތުކުރެވޭ މައްސަލަތަކުގެ އިތުރުން ދަރަނީގެ ގިނަ މައްސަލަތަކެއް ފެންމަތިވެފައި އޮންނަތާ ގިނަ ދުވަސްތަކެއް ވެފައިވާއިރު، އެފްއޭއެމްގެ ލީޑާޝިޕް ބަދަލު ކުރުމުގެ ބޮޑު ކެމްޕޭނެއްވެސް ވަނީ ފަށާފައެވެ.
